کراچی، یکم جولائی (اے پی پی):قائد حزب اختلاف سندھ حلیم عادل شیخ نے کپتان وزیراعظم عمران خان کو خراج تحسین پیش کرتے ہوئے کہا ہے کہ وزیراعظم نے مسلم امہ کا سر فخر سے بلند کردیا ہے، وزیراعظم نے دو ٹوک کہا ابسلوٹلی ناٹ، یہ بونے پرچی کی پیداوار والے لیڈر کہتے تھے وائی ناٹ۔
ان خیالات کا اظہار انہوں نے جمعرات کو سندھ اسمبلی میں پریس کانفرنس سے خطاب کرتے ہوئے کیا۔ اس موقع پر ان کے ہمراہ رکن سندھ اسمبلی راجہ اظہر، پی ٹی آئی رہنما حاجی نثار آرائیں اور دیگر بھی موجود تھے۔ حلیم عادل شیخ نے کہا کہ بلاول زرداری نے جوان ہوتے ہی اومنی گروپ دیکھا،تھر کے آر او پلانٹ کا پیسہ بلاول کے ناشتے پر استعمال ہوا، بلاول نے کبھی بھی اپنی محنت سے ایک روپیہ نہیں کمایا، پی پی اب لیڈر لیس ہوچکی ہے، پیپلزپارٹی میں کوئی لیڈر بچا نہیں ہے، چھوٹے زرداری کا سندھ میں گینگ ہے،جسے مراد علی شاہ لیڈ کرتے ہیں، یہ چھوٹو گینگ کی طرح گینگ ہیں۔
انہوں نے کہا کہ بلاول بڑی لیڈر کے چھوٹے بیٹے ہیں، کہاں مخدوم شاہ محمود قریشی اور کہاں بلاول زرداری،جعلی بھٹو بننا بھی اصلی بھٹوز کی توہین ہے، اسامہ کے معاملے پر بڑے زرداری نے کہا وائی ناٹ، پیسے کتنے دوگے، لیکن وزیراعظم نے سب سے پہلے لندن میں بیٹھے شخص کو دہشتگرد کہا، انہوں نے تو لندن میں جاکر ٹوپیاں پہنائیں، پی پی کے دور میں ڈرون اٹیک سب سے زیادہ ہوئے،340 ڈرون اٹیک ہوئے اور یہ کہتے رہے وائی ناٹ، غیرتمند قوم غیرتمند لیڈر آج موجود ہیں۔
قائد حزب اختلاف سندھ حلیم عادل شیخ نے کہا کہ میں نے اسمبلی میں پریولیج موشن پیش کیا ہے، چارٹر آف ڈیموکریسی میں محترمہ بینظیر بھٹو نے دستخط کئے تھے جس میں لکھا ہے کہ اپوزیشن لیڈر پبلک اکائونٹس کمیٹی کا چیئرمین ہوگا، مگر سندھ میں تو ممبر بھی نہیں رکھا گیا، آڈیٹر جنرل کی رپورٹ اسمبلی میں نہیں پیش کی گئی، پری بجٹ سیشن بھی ٹائم پر شروع نہیں ہوا، جو کہ رول کی خلاف ورزی ہے۔انہوں نے کہا کہ قومی اسمبلی میں اپوزیشن لیڈر اور بلاول کو موقع دیا گیا،سندھ اسمبلی میں چارپائی ان کو اپنا جنازہ لگ گیا، ہمیں مائیک پھینک کر مارا گیا،تھپڑ مارے گئے،جوتے اور پرس اٹھانے والے وزیر نے گالیاں دیں، دھمکیاں دیں لیکن ہمارے پارلیمانی لیڈر اور اپوزیشن لیڈر کو تقریریں کرنے نہیں دی گئی ۔
حلیم عادل شیخ نے کہا کہ مراد علی شاہ اور مفاہمت والے شاہ جھوٹ بول رہے ہیں، اسمبلی میں چارپائی لانے پر مجھے افسوس ہے لیکن ہم کیا کریں، اسمبلی بلڈنگ میں ممبران کو جانے سے روکا گیا، اسمبلی بھی انہوں نے باپ کی جاگیر بنادی ہے، چیک کیا جائے اس کا کھاتہ بھی اپنے نام کرالیا ہوگا، آئی جی سندھ کے خلاف تحریک استحقاق جمع کرادی ہے ۔ انہوں نے کہا کہ سعید غنی خود زیرتعلیم وزیر ہیں، ہم اسپیکر سے بات کرنے گئے تھے، انہوں نے کہا سینیئر وزرا سے بات کریں۔
