اسلام آباد۔30جولائی (اے پی پی):وزیراعظم عمران خان نے کہا ہے کہ خطے میں سیاحت کی بے انتہاء گنجائش موجود ہے۔اس صلاحیت کو برؤے کار لانے، جدید انفراسٹرکچر کے قیام اور مقامی آبادی کو سیاحت کے شعبے میں تربیت فراہم کرنے کی ضرورت ہے،انہوں نے ان خیالات کا اظہار گلگت بلتستان کونسل کے بارویں (12) سیشن کی صدارت کرتے ہوئے کیا،کونسل نے گلگت بلتستان میں عوام کو مواصلات کی بہتر سہولیات کی فراہمی کی غرض سے نیکسٹ جنریشن موبائل سروسز سپیکٹرم کی نیلامی کے حوالے سے پالیسی ڈائریکٹیو کے اجرا کی منظوری دی۔ اجلاس میں گلگت بلتستان کونسل (الیکشن) رولز2021کی منظوری دی گئی۔ گلگت بلتستان کونسل کے چھ ممبران کا انتخاب گلگت بلتستان کونسل (الیکشن) رولز2021 کے تحت کیا جائے گا۔ کونسل نے منہاس حسین، ڈسٹرکٹ اینڈ سیشن جج غذر، کی بطور جج بینکنگ اینڈ کسٹمز کورٹ گلگت بلتستان تعیناتی کی منظوری دی۔جناب منہاس حسین کو جج قومی احتساب کورٹ گلگت بلتستان کا اضافی چارج دینے کی بھی منظوری دی گئی۔ ایجنڈے کی باقاعدہ منظوری کے بعد وزیرِ اعظم عمران خان نے وزیرِ اعلیٰ گلگت بلتستان سے حالیہ بارشوں کے نتیجے میں پیدا ہونے والی صورتحال اور ریلیف اقدامات کے حوالے سے بریفنگ لی۔ گلگت بلتستان میں سیاحت کی استعداد کو برؤے کار لانے اور فروغ کے حوالے سے بھی تفصیلی تبادلہ خیال کیا،وزیرِ اعظم نے کہا کہ خطے میں سیاحت کی بے انتہاء گنجائش موجود ہے۔ ضرورت اس امر کی ہے کہ اس صلاحیت کو برؤے کار لانے، جدید انفراسٹرکچر کے قیام اور مقامی آبادی کو سیاحت کے شعبے میں تربیت فراہم کی جائے تاکہ جہاں سیاحت کو فروغ حاصل ہو وہاں مقامی آبادی کو بہتر معاشی مواقع میسر آ سکیں۔
