اسلام آباد،02جولائی (اے پی پی): چیئرمین سینیٹ محمد صادق سنجرانی نے کہا ہے کہ پاکستان اور سعودی عرب برادرانہ تعلقات باہمی اعتماد اور محبت کے لازوال رشتوں میں جڑے ہیں، دونوں ممالک نے ہر اہم فورم پر ایک دوسرے کے مؤقف کی ہمیشہ حمایت کی ہے، سعودی سرمایہ کار پاکستان میں تجارت اور سرمایہ کاری کے مواقع سے فائدہ اٹھا سکتے ہیں۔ ان خیالات کا اظہار انہوں نے سعودی عرب کے سفیر نواف بن سعید المالکی سے گفتگو کرتے ہوئے کیا جنہوں نے جمعہ کو یہاں ان سے پارلیمنٹ ہاؤس میں ملاقات کی۔ ملاقات کے دوران باہمی دلچسپی کے امور اور خاص طور پر خطے کی مجموعی صورتحال پر تفصیلی تبادلہ خیال کیا گیا۔
اس موقع پر گفتگو کرتے ہوئے چیئرمین سینیٹ محمد صادق سنجرانی نے کہا کہ پاکستان سعودی عرب کے مابین برادرانہ تعلقات باہمی اعتماد اور محبت کے لازوال رشتے میں جڑے ہیں، دونوں ممالک کے تعلقات کی بنیاد مابین مذہبی، تاریخی، ثقافتی اور سماجی مماثلتوں پر ہے۔ انہوں نے کہا کہ ہم مسلم اُمہ کے قائد کی حیثیت سے سعودی مملکت کے کردار کو سراہتے ہیں، پاکستانی عوام اور حکومت پاکستان کے دل میں خادم الحرمین شریفین اور سعودی قیادت کے لئے بے پناہ احترام ہے۔ انہوں نے کہا کہ پاکستان سعودی عرب کی خود مختاری اور علاقائی سالمیت کو درپیش کسی بھی خطرے کے خلاف سعودی عرب کے ساتھ کندھے سے کندھا ملا کر کھڑا ہے۔
چیئرمین سینیٹ نے کہا کہ سعودی قیادت کی سرپرستی میں شروع کردہ خلیجی ریاستوں کے مابین تعلقات کی بحالی علاقائی امن کے لئے سعودی کاوشوں کا ثبوت ہے، دونوں ممالک نے ہر اہم فورم پر ایک دوسرے کے مؤقف کی ہمیشہ حمایت کی ہے۔ انہوں نے کہا کہ سعودی عرب کی جانب سے ایف اے ٹی ایف میں پاکستان کی مسلسل حمایت پر شکریہ ادا کرتے ہیں، دونوں ممالک کے مابین تجارت اور سرمایہ کاری کے شعبوں میں دوطرفہ تعاون کو فروغ دینے کیلئے وسیع گنجائش موجود ہے۔ انہوں نے کہا کہ سی پیک خطے کیلئے مستقبل کا گیم چینجر ثابت ہوگا، سعودی سرمایہ کار پاکستان میں تجارت اور سرمایہ کاری سے بھر پور استفادہ کریں۔
چیئرمین سینیٹ نے کہا کہ ادارہ جاتی سطح پر پارلیمانی وفود کے تبادلوں میں مزید تیزی لانے کی ضرورت ہے، پاکستانیوں کی کثیر تعداد سعودی عرب کی ترقی میں اہم کردار ادا کر رہی ہے، سعودی عرب میں مقیم پاکستانیوں کے مسائل کے حل کیلئے سعودی قیادت کا کردار قابل تحسین ہے ۔
سعودی سفیر نے کہا کہ پاکستان کے ساتھ برادرانہ تعلقات انتہائی اہمیت کے حامل ہیں، سعودی عرب کی جانب سے پاکستان میں وسیع سرمایہ کاری پاکستان پر اعتماد کا اظہار ہے۔ انہوں نے کہا کہ باہمی تعلقات کی مضبوطی سے حالات بہتری کی جانب گامزن ہیں، پاکستان سعودی عرب کیلئے ایک انتہائی اہم ملک ہے، پاکستان کی ایوان بالاء اور سعودی شوریٰ کونسل کے مابین ادارہ جاتی تعاون پر مزید پیشرفت ہونی چاہئے۔
سعودی سفیر نے کہا کہ پاکستان میں موجود سرمایہ کاری کے وسیع مواقع سے استفادہ کیا جائےگا۔
