کوئٹہ، یکم جولائی(اے پی پی ): وزیرداخلہ بلوچستان میرضیاء لانگو نے کہا ہے کہ کوئٹہ کے ائیرپورٹ روڈ پر موٹرسائیکل میں نصب بم دھماکے کے نتیجے میں 5سیکورٹی اہلکار زخمی ہوگئے ہیں۔ دھماکے میں 3سے4کلو گرام دھماکہ خیز مواد استعمال کیا گیا جوکہ موٹرسائیکل میں نصب تھا۔
وزیرداخلہ بلوچستان میرضیاء لانگو نے جائے وقوعہ کے معائنے کے موقع پر صحافیوں سے بات چیت کرتے ہوئے بتایا کہ کوئٹہ کے علاقے ائیر پورٹ روڈ پر سیکورٹی فورسز کی گاڑیاں گزر رہی تھیں کہ انکے قریب موٹرسائیکل میں نصب بم زوردار دھماکے سے پھٹ گیا جس کے نتیجے میں 5سیکورٹی اہلکارزخمی ہوگئے، زخمیوں کو فوری طور پر سی ایم ایچ کوئٹہ منتقل کردیا گیا۔انہوں نے کہا کہ افغانستان میں بھارت جیسا دشمن ملک بیٹھ کر پاکستان اور بالخصوص بلوچستان میں دہشت گردی کر رہا ہے اور اس مقصد کیلئے افغان سرزمین استعمال ہورہی ہے، دہشت گردی کے واقعات کے تانے بانے بھارت سے ملتے ہیں
وزیرداخلہ بلوچستان میرضیاء لانگو نے کہا کہ افغانستان کے حالات جب تک معمول کے مطابق ٹھیک نہیں ہوتے اسکے اثرات ہم پر پڑتے رہیں گے اوردہشت گردی کے واقعات ہوسکتے ہیں۔انہوں نے کہاکہ دشمن پاکستان کی ترقی میں رکاوٹ ہے اور اس میں خلل ڈالنا چاہتا ہے لیکن ہم انہیں اپنے مذموم مقاصد میں کامیاب نہیں ہونے دیں گے۔
