اسلام آباد، 21 اگست (اے پی پی): وفاقی وزیر اطلاعات ونشریات چوہدری فواد حسین نے کہا ہے کہ افغانستان میں حکومت سازی افغانستان کے عوام نے کرنی ہے، ہماری کوششیں پرامن اور مستحکم افغانستان کے لئے جاری ہیں، افغانستان میں امن اور استحکام کے لئے ہمارا کردار سب سے اہم ہے۔
افغانستان کی موجودہ صورتحال کے حوالے سے اپنے ویڈیو پیغام میں وفاقی وزیر اطلاعات نے کہا کہ افغانستان کی صورتحال کے حوالے سے تمام عالمی اور علاقائی طاقتوں کے ساتھ ہمارا قریبی رابطہ ہے۔انہوں نے کہا کہ کابل میں پاکستانی سفارت خانہ کو انٹرنیشنل میڈیا سمیت پوری دنیا میں پذیرائی مل رہی ہے، پاکستان انٹرنیشنل ایئر لائن نے کابل سے انخلاءمیں تقریباً 1400 افراد کو مدد فراہم کی۔
وفاقی وزیر اطلاعات ونشریات چوہدری فواد حسین نے کہا کہ کابل میں پیدا ہونے والی صورتحال کے باعث صحافیوں، انٹرنیشنل میڈیا کے ارکان، آئی ایم ایف، ورلڈ بینک اور مختلف سفارت خانوں کے عملہ کا انخلاءمشکل ہو گیا تھا۔انہوں نے کہا کہ اس وقت تک تقریباً چار ہزار ویزے جاری کئے جا چکے ہیں، دو ہزار کے قریب لوگوں کو کابل سے نکالا جا چکا ہے۔
