اسلام آباد،22اگست (اے پی پی):وزیر داخلہ شیخ رشید احمد نے کہا ہے کہ افغانستان میں پائیدار امن خطے کی ترقی اور دنیا کی سلامتی کے لئے اہم ہے، افغانستان میں امن اورمستحکم حکومت کے لئے اپنا کردار ادا کرتے رہیں گے، پاکستان اور چین کے باہمی تعاون اور ترقی کو دہشت گردوں کے ہاتھوں یرغمال نہیں ہونے د یں گے۔
ان خیالات کا اظہار انہوں نے چینی سفیر نونگ رونگ سے ملاقات کے دوران کیا۔ پاکستان میں چین کے سفیر نونگ رونگ نے اتوار کو وزیر داخلہ کی رہائشگاہ پر ان سے ملاقات کی۔ ملاقات کے دوران پاک چین دوطرفہ تعلقات سمیت خطے کی مجموعی صورت حال پر تبادلہ خیال کیا گیا۔ وزیر داخلہ شیخ رشید احمد نے چینی سفیر اور دیگر سفارتی عملے کو ظہرانہ بھی دیا۔
اس موقع پر وزیر داخلہ نے کہا کہ افغانستان میں تبدیل ہوتے حالات کے پیش نظر ہمارا خطہ اور زیادہ اہمیت اختیار کرچکا ہے، افغانستان میں پائیدار امن خطے کی ترقی اور دنیا کی سلامتی کے لئے اہم ہے۔ انہوں نے کہا کہ افغانستان میں امن اورمستحکم حکومت کے لئے اپنا کردار ادا کرتے رہیں گے۔
وزیر داخلہ نے کہا کہ وزارت داخلہ افغانستان سے نکلنے والوں کو بھر پور معاونت دے رہی ہے، چینی شہریوں اور پاکستان میں کرنے والی چینی کمپنیوں کی سکیورٹی کو مزید بہتر بنائیں گے، چینی شہریوں کی حفاظت کےلئے مشترکہ حکمت عملی ترتیب دے رہے ہیں۔انہوں نے کہا کہ پاکستان اور چین کے باہمی تعاون اور ترقی کو دہشت گردوں کے ہاتھوں یرغمال نہیں ہونے د یں گے۔
اس موقع پر چینی سفیر نے کہا کہ پاکستان میں چینی کمپنیاں مختلف منصوبوں پر کام کر ر ہی ہیں، چینی شہریوں اور کمپنیوں کے لئےسکیورٹی پرٹوکول مزید سخت کیا جائے۔
