اسلام آباد، 5 اگست ( اےپی پی): اوآئی سی کے انسانی حقوق کمشن کے بارہ رکنی وفد نے وزارتِ خارجہ میں وزیر خارجہ مخدوم شاہ محمود قریشی سے ملاقات کی۔ اس موقع پر وزیر خارجہ مخدوم شاہ محمود قریشی نے کہا کہ آج 5 اگست کے دن آپ کی آمد ہمارے لیے خصوصی اہمیت کی حامل ہے۔آج پورے ملک میں مقبوضہ جموں و کشمیر میں بسنے والے کشمیریوں کے ساتھ اظہار یکجہتی اور بھارت کے 5 اگست 2019 کے یک-طرفہ اور غیر آئینی اقدامات کے خلاف احتجاج ہو رہا ہے۔مقبوضہ جموں و کشمیر میں بھارتی مظالم اور انسانی حقوق کی سنگین خلاف ورزیوں کا سلسلہ تواتر سے جاری ہے۔نہتے کشمیریوں کو بنیادی انسانی حقوق سے محروم رکھا جا رہا ہے۔خواتین کی بے حرمتی معمول بن چکا ہے۔
وزیر خارجہ نے کہا کہ بھارت سرکار ، مقبوضہ جموں و کشمیر میں جغرافیائی تناسب کو تبدیل کرنے کیلئے، بین الاقوامی قوانین سے رو گردانی کرتے ہوئے، اب تک 3.8 ملین ڈومیسائل سرٹیفکیٹ جاری کر چکی ہے۔بھارت کی جانب سے کشمیر پریمیر لیگ جیسے ایونٹ کو متنازعہ بنانے کی کوشش کی گئی۔ہم بھارت سمیت خطے میں ہمسایہ ممالک کے ساتھ پرامن طریقے سے رہنے کے متمنی ہیں۔بھارت نے اپنے یک-طرفہ اقدامات سے خطے کے امن کو خطرات سے دو چار کیا ۔
شاہ محمود قریشی نے مزید کہا کہ آج ہندوستان کی کشمیر پالیسی کے خلاف آوازیں ہندوستان کے اندر سے آٹھ رہی ہیں۔
میں اس موقع پر سابق صدر جنرل اسمبلی والکن بوذکر کا ذکر کرنا ضروری سمجھتا ہوں۔ فلسطین اور کشمیر کے معاملے پر جناب والکن بوذکر کی خدمات قابل تحسین ہیں۔
۔ اس موقع پر سیکرٹری خارجہ سہیل محمود ،اسپیشل سیکرٹری رضا بشر تارڑ اور وزارتِ خارجہ کے سینئر افسران بھی اس موقع پر موجود تھے۔
