بہاولنگر، 14اگست (اے پی پی ): ضلع بھرمیں جشن آزادی کی تقریبات کا آغاز ہوگیا ہے ،ڈسٹرکٹ پبلک سکول میں جشن آزادی کے حوالے سے رنگارنگ تقریب اور نمائش کا انعقاد کیا گیا جس میں محتلف شعبہ ہائے زندگی سے شخصیات، طلباء والدین اساتذہ نے بھرپور شرکت کی ۔
تقریب کے مہمان خصوصی ڈپٹی کمشنر شفقت اللہ مشتاق ، ڈی پی او ظفر بزدار تھے۔ ڈپٹی کمشنر شفقت اللہ مشتاق نے پرنسپل پروفیسر شفیق احمد کے ہمراہ کیک کاٹ کر تقریب کا آغاز کیا ۔اس موقع پر ملی نغموں پر طلباء نے خوبصورت ٹیبلو پیش کئے ۔
طلباء کی جانب سے مینار پاکستان اور دیگر تاریخی مقامات کے خوبصورت ماڈلز بنائے گئے ہیں۔ شرکاء نے طلباء کی شاندار پرفارمنس کو زبردست سراہا ۔تقریب سے خطاب کرتے ہوئے ڈپٹی کمشنر شفقت اللہ مشتاق نے کہا کہ پاکستان کے قیام کےلئے ہمارے آباو اجداد نے لازوال قربانیاں دیں تھیں، ہمیں اپنی نوجوان نسل کو ان قربانیوں سے روشناس کرانا ہے۔
ڈی پی او ظفر بزدار نے کہا پولیس استحکام پاکستان کےلئے قربانیاں پیش کررہی ہے۔ پرنسپل پروفیسر شفیق احمد نے بتایا کہ ڈی پی ایس میں جشن آزادی کی تقریبات 30 دن جاری رہیں گی۔
اے پی پی /گھمن/نورین
