اسلام آباد۔25اگست (اے پی پی):سربراہ پاک فضائیہ ایئر چیف مارشل ظہیر احمد بابر سدھو سے اٹلی کے سفیر اینڈریاس فیراریز نے بدھ کو یہاں ان کے دفتر میں ملاقات کی۔ ترجمان پاک فضائیہ کے مطابق اٹلی کے سفیر نے پاک فضائیہ کی پیشہ وارانہ مہارت اور پی اے ایف کی طرف سے گذشتہ سالوں میں بالخصوص خود انحصاری کے میدان میں ہونے والی غیر معمولی پیشرفت کو سراہا۔ ایئر چیف نے کہا کہ دونوں ممالک کے درمیان خوشگوار تعلقات قائم ہیں۔ انہوں نے دونوں فضائی افواج کے مابین موجودہ دوطرفہ تعاون کو مزید فروغ دینے کے عزم کا اعادہ بھی کیا۔ ملاقات کے دوران باہمی دلچسپی اور پیشہ وارانہ تعاون کے مختلف امور بھی زیربحث آئے۔
