لاہور05 اگست (اے پی پی ): وزیر بلدیات میاں محمود الرشید کی زیر صدارت پنجاب میونسپل ڈویلپمنٹ فنڈ کمپنی کے حوالے سے اہم اجلاس ہوا ۔اجلاس میں سیکرٹری بلدیات نورالامین مینگل نے پنجاب سیٹیز پروگرام اور پنجاب انٹرمیڈیٹ سیٹیز امپروومنٹ انویسٹمنٹ پروگرام کے حوالے سے بریفنگ دی وائس چیئرمین واساامتیاز شیخ، ایڈیشنل سیکرٹری ڈویلپمنٹ شاہد زمان لک ایم ڈی پنجاب انٹرمیڈیٹ سیٹیز امپروومنٹ پروگرام عمر جہانگیر ,ایم ڈی پنجاب سیٹیز پروگرام افتخار رسول نے اجلاس میں شرکت کی ۔اجلاس سے گفتگو کرتے ہوئے میاں محمودالرشید نے کہا کہ پنجاب سٹیز پروگرام کے تحت ترقیاتی اسکیموں پر کام کی رفتار تیز کی جائے پروکیورمنٹ کے لیے تمام تر قانونی تقاضے پورے کیے جائیں ترقیاتی سکیموں کی مانیٹرنگ کا موثر میکینزم وضع کیا جائے۔انہوں نے کہا کہ وزیراعظم اور وزیراعلی کے ویژن کے مطابق ترقیاتی منصوبوں میں شفافیت اولین ترجیح ہے،شہریوں کو اعلیٰ درجے کی میونسپل سروسز کی فراہمی یقینی بنائی جائے گی محکمہ بلدیات کو عوامی خدمت کا مثالی ادارہ بنایا جائے گا ، میاں محمود الرشید نے کہا کہ حکومت پنجاب کے مشن کے مطابق عوام کی دہلیز پر سہولیات کی فراہمی یقینی بنا رہے ہیں پنجاب سیٹیز پروگرام کے تحت 34ارب کی لاگت سے 16شہروں میں میونسپل انفراسٹرکچر کی فراہمی کے لیے کام کر رہا ہے۔پی سی پی کے تحت واٹر سپلائی، سیوریج، سالڈ ویسٹ مینجمنٹ،عوامی پارکس،سٹریٹ لائٹس کی سہولیات دی جا رہی ہیں۔اس موقع پر سیکرٹری بلدیات نورالامین مینگل نے بتایا کہ ترقیاتی منصوبوں کو بین الاقوامی اسٹڈیز کے تعاون سے ڈیزائن کیا گیا ہےپنجاب انٹرمیڈیٹ سیٹیز امپروومنٹ انویسٹمنٹ پروگرام کے پہلے فیز میں 44 ارب کی لاگت سے سیالکوٹ اور ساہیوال میں ترقیاتی کام جاری ہیں۔پروگرام کے دوسرے مرحلے میں راولپنڈی،سرگودھا ،مظفر گڑھ،رحیم یار خان،ڈی جی خان ،بہاولپور اور ملتان کو شامل کیا جا رہا ہے۔
