اسلام آباد،20اگست (اے پی پی):وزیر اعظم عمران خان نے کہا ہے کہ ملک میں مکمل طور پرغیر جانب دار، آزاد اور ذمہ دارانہ صحافت کا فروغ حکومت کی اولین ترجیح ہے۔ان خیالات کا اظہار انہوں نے افغانستان میں موجود غیر ملکی صحافیوں کے انخلا کے حوالے سے کیے جانے والے اقدامات کے لئے اپنی زیر صدارت اجلاس میں گفتگو کرتے ہوئے کیا۔ وزیرِ اطلاعات ونشریات چوہدری فواد حسین نے وزیرِ اعظم کو افغانستان میں موجود صحافیوں کے انخلا کے حوالے سے وزارتِ اطلاعات کے اقدامات سے متعلق بریفنگ دی۔ غیر ملکی صحافیوں کی پاکستان آمد اور ان کو ویزہ سمیت دیگر سہولیات کی فراہمی کے حوالے سے معاملات پر بھی تفصیلی بریفنگ دی گئی۔
وزیر اطلاعات نے بتایا کہ افغانستان کی صورتحال کے پیش نظر صحافیوں کی سہولت کے لئے وزارتِ اطلاعات میں خصوصی سیل قائم کیا گیا ہے تاکہ موصول شدہ درخواستوں پر فوری عمل درآمد کو یقینی بنایا جا سکے۔ وزیرِ اعظم نے بین الاقوامی صحافی برادری کی سہولت کی خاطر وزارت اطلاعات خصوصاً ایکسٹرنل پبلسٹی ونگ کے اقدامات کو سراہا اور میڈیا کے حوالے سے دیگر امور پر بھی تبادلہ خیال بھی کیا۔
اجلاس میں گفتگو کرتے ہوئے وزیر اعظم نے کہا کہ ملک میں مکمل طور پرغیر جانب دار، آزاد اور ذمہ دارانہ صحافت کا فروغ حکومت کی اولین ترجیح ہے۔
اجلاس میں وزیرِ مملکت برائے اطلاعات فرخ حبیب، سیکرٹری اطلاعات و دیگر سینئر افسران بھی شریک ہوئے۔
