لاہور، 22 اگست ( اے پی پی): بزدار حکومت کا ایک اور مثالی اقدام پنجاب میں ریسکیو ائیر ایمبولینس سروس کا آغاز کرنے کا فیصلہ، وزیراعلی عثمان بزدار نے ریسکیو ائیر ایمبولینس سروس سے متعلقہ امور جلد از جلد نمٹانے کی ہدایت کر دی ۔
وزیراعلیٰ پنجاب عثمان بزدار کی زیرصدات اعلیٰ سطح کے اجلاس میں صوبے میں ریسکیو ائیرایمبولینس سروس شروع کرنے کے لئے اقدامات کاجائزہ لیا گیا۔وزیر اعلی سردار عثمان بزدار نے کہا کہ ریسکیو ائیر ایمبولینس کے آغاز سے ریسکیو سروسز کو نئی شناخت ملے گی اور پنجاب خطے میں ریسکیو ائیر ایمبولینس شروع کرنے والا پہلا صوبہ ہوگا۔انہوں نے کہا کہ ریسکیو ائیر ایمبولینس سروس سے دور دراز علاقوں تک ریسکیو کا دائرہ کار وسیع ہو گا،ریسکیو ائیر ایمبولینس سروس کا اجراء وقت کا تقاضہ ہے۔
عثمان بزدار کا مزید کہنا تھا کہ ہر انسانی جان قیمتی ہے اور بروقت علاج معالجہ ہر فرد کا حق ہے۔انہوں نے کہا کہ ریسکیو ائیرایمبولینس کے اجراء کے لئے فوری طور پر ضروری اقدامات اٹھائےجائیں گے، پنجاب میں ریسکیوسروسز کی بہتری کے لئے تاریخی اقدامات کئے ہیں اور پنجاب کی ریسکیو1122سروسز کی خدمات کو عالمی سطح پر بھی تسلیم کیا گیاہے ۔
ایڈیشنل چیف سیکرٹری،پرنسپل سیکرٹری وزیراعلیٰ او رڈی جی ریسکیو سروسز اکیڈمی پنجاب نے بھی اجلاس میں شرکت کی ۔
