لاہور۔3اگست (اے پی پی):سعودی عرب سے رہائی پانے والے 28 پاکستانی قیدی پی آئی اے کی خصوصی پرواز کے ذریعے وطن واپس پہنچ گئے، لاہور کے علامہ اقبال انٹرنیشنل ایئرپورٹ پر سینیٹر اعجاز احمد چوہدری نےان کا استقبال کیا، اس موقع پر پی ٹی آئی کے کارکن،قیدیوں کے لواحقین اور عزیز و اقارب کی بڑی تعدادموجود تھی ۔ میڈیا سے گفتگو کرتے ہوئے سینیٹر اعجاز احمد چوہدری نے کہا کہ وزیر اعظم عمران خان کی ہدایت پر سعودیہ میں قید پاکستانیوںکی وطن واپسی پر انہیں خوش آمدید کہنے آیا ہوں،ہمارے لیے یہ انتہائی خوشی کا لمحہ ہے ۔انہوں نے کہا کہ اس سے قبل عید پر 62 اور آج 28 لوگ وطن واپس آئے ہیں، قیدیوں کی رہائی پر ہم وزیر اعظم عمران خان اور سعودی حکومت کے شکر گزار ہیں، ان پاکستانیوں کو وزیراعظم عمران خان کی کاوشوں کی وجہ سے اپنے پیاروں سے ملنے کا موقع ملا ہے۔ سینیٹر اعجاز احمد چوہدری نے کہا کہ دنیا کے تمام ممالک سے قیدیوں کی رہائی کے حوالے سے مذاکرات جاری ہیں، گلف میں پاکستانی قیدی زیادہ ہیں اس لیے وہاں زیادہ فوکس کیا جا رہا ہے ۔انہوں نے کہا اس موقع پر پوری قوم کی طرف سے سعودی حکومت کا شکریہ ادا کرتا ہوں۔ذرائع کے مطابق رہائی پانے والوں میں 19 قیدی سرکاری اخراجات پر جبکہ 9 قیدی ذاتی سفری خرچ پر لاہور پہنچے،سعودی عرب سے رہائی پانے والے 19 میں سے 7 قیدیوںحیات اللہ، زاہد خان، رحیم اللہ ، عمران خان ،غلام خان، محمد اسماعیل اور عبیداللہ کا تعلق مہمند ایجنسی سے ہے،رہائی پانے والے سراج خان کا تعلق لوئر دیر سے ہے جبکہ محمد زبیر کا تعلق سیالکوٹ سے ہے،رہائی پانے والوں میں سوات کے رحمت شاہ اور شبیر شاہ جبکہ کرم ایجنسی سے تعلق رکھنے والے ارہب حسین بھی شامل ہیں۔صفدراللہ باچا اور نہار احمد کا تعلق چار سدہ سے ہے،اکرام اللہ شاہ کا تعلق ہنگو سے ہے،مردان سے تعلق رکھنے والے عزت خان ،پشاور سے تعلق رکھنے والے سید محمد، ایبٹ آباد کے آصف رضا اور لاڑکانہ کے غلام مرتضی بھی رہائی پانے والوں میں شامل ہیں ۔اس موقع پر رہائی پانے والے قیدیوں سراج خان ،غلام مرتضی ٰو دیگر نے جذباتی ہو کر بتایا کہ اپنے ملک واپس آکرانہیں انتہائی خوشی محسوس ہورہی ہے ،طویل عرصے سے اپنے پیاروںکو ملنے کیلئے بیتاب تھے ، ہم وزیراعظم عمران خان کے شکر گراز ہیں جنہوں نے ہماری رہائی کے لیے اقدامات کئے اور جرمانے بھی ادا کئے۔
