پاکستان اور ترکی اپنے اپنے خطے میں امن ، استحکام اور ترقی کے فروغ کے خواہاں ہیں ؛صدر عارف علوی

استنبول ،15اگست  (اے پی پی): صدر مملکت ڈاکٹر عارف علوی نے کہا  ہے کہ  پاکستان اور ترکی اپنے اپنے خطے میں امن ، استحکام اور ترقی کے فروغ کے خواہاں ہیں۔دونوں ممالک مشترکہ چیلنجز اور نئے ابھرتے ہوئے خطرات سے نمٹنے کے لیے مختلف شعبوں بالخصوص دفاع میں اپنے تعاون کو مزید مستحکم کر رہے ہیں۔

ان خیالات کا  اظہار صدر مملکت ڈاکٹر عارف علوی نے  اتوار کو   یہاں  پاک بحریہ کی پہلی ملجم کلاس کورویٹ کی تقریب رونمائی سے خطاب میں  کیا۔ ترک صدر رجب طیب اردوان  نے بھی تقریب میں  شرکت کی ۔بیگم ثمینہ عارف علوی نے دعائیہ کلمات کے ساتھ ملجم کلاس بحری جہاز کو سمندر میں اتارا۔

صدرمملکت ڈاکٹر  عارف علوی نے کہا کہ منصوبے کی بروقت تکمیل پاکستان اور تُرکی کے مابین مضبوط تعلقات کا منہ بولتا ثبوت ہے۔ انہوں نے کہا کہ ملجم بحری جہازوں کے منصوبے سے دونوں برادر ممالک کے درمیان دفاعی تعاون کو مزید فروغ حاصل ہوگا۔

  صدر مملکت  ڈاکٹر  عارف علوی نے تنازعہ جموں و کشمیر پر ترکی کی مسلسل حمایت کو سراہا اور قبرص کے مسئلے پر ترکی کی پاکستان کی غیر متزلزل حمایت کا اعادہ کیا۔

ترکی کے  صدر رجب طیب اردوان  نے کہا کہ  ترکی اور پاکستان کے بھائی چارے اور دوستی کی گہری جڑیں ہیں،ترک عوام پاکستان کے لیے اپنے دلوں میں ایک خاص مقام رکھتے ہیں۔ انہوں نے کہا کہ  کورونا کے باوجود پاکستان اور ترکی کی باہمی تجارت بہتر ہو رہی ہے۔ صدر رجب طیب اردوان نے کہا کہ افغانستان سمیت علاقائی امن اور استحکام کو فروغ دینے کے لیے مل کر کام کرنے کی ضرورت ہے۔

 اس موقع پر چیف آف دی نیول اسٹاف ایڈمرل امجد  نیازی نے ملجم منصوبے کی عظیم کامیابی کو سراہا۔