لاہور ،26اگست(اے پی پی): محکمہ اوقاف ومذہبی امور پنجاب کے زیر اہتمام برصغیر پاک وہند کے معروف صوفی بزرگ حضرت بابا بلھے شاہ رحمۃ اللہ علیہ کے 264ویں سالانہ عرس مبارک کی تقریبات کے لئے 3 لاکھ 52 ہزار روپے جاری کر دئیے ہیں ۔ صوبائی وزیر اوقاف پیر سیّد سعیدا لحسن شاہ نے آج عرس مبارک کی تقریب کا افتتاح مزار اقدس پر پھو لوں کی چادر پوشی سے کیا۔ ملک کی ترقی و سلامتی،افواج پاکستان،کشمیر کے محصورین اوروباؤں و بیماریوں سے بچاؤ کے لئے خصوصی دعا کی گئی۔ اس موقع پر ضلعی انتظامیہ کے افسران علمائے کرام،دانشور اور صحافی حضرات بھی موجود تھے۔عرس مبارک کی ایک روزہ تقریب آج ہی اختتام پزیر ہو جائے گی۔اس موقع پر صوبائی وزیر نے اپنے خطاب میں کہا کہ فلاحی معاشرے کی تشکیل کے لئے بزرگان اسلام کی تعلیمات سے رہنمائی کی از حد ضرورت ہے۔ ان کے افکار اسلامی علوم و معارف کا خزانہ اوران کے آستانے روحانی فیوض کے مراکز ہیں۔ تمام بزرگان کی کتب شریعت و طریقت کے مضامین سے آراستہ ہیں۔انہوں نے صوفیانہ افکار و تعلیمات کو مکمل طورپر احکامِ شریعت کے نہ صرف تابع قراردیا بلکہ تصوف کو شریعت کا امین و نگہبان بنا کر پیش کیا اور یوں برصغیر میں ایک ایسے اسلامی مکتبِ تصوف کی بنیاد رکھی جِس کی بلندیوں پر ہمیشہ شریعت و طریقت کا پرچم لہراتا رہے گا۔ ایک ہزار سال قبل ہند کی سرزمین میں ان بزرگان ؒ نے حرفِ حق کے ذریعے اللہ تعالیٰ کی وحدانیت، نبی صلی اللہ علیہ و آلہ وسلم کی رسالت اور اسلام کی حقانیت کا جو بیج بویا،وہ اللہ تعالیٰ کی تائیدنصرت سے ایک ایسا تناور درخت بن گیا جِس کی جڑیں اس سرزمین میں نہایت مضبوط ہوگئیں اور شاخیں وسیع فضاؤں میں پھیل گئیں۔ انہوں نے کہا کہ صوبہ بھر کے محکمہ اوقاف کے زیر کنٹرول تمام درباروں کی تزین و آرائش بارے احکامات دے دئیے گئے ہیں۔
