کوئٹہ،21اگست (اے پی پی ):چیف جسٹس بلوچستان ہائی کورٹ جسٹس نعیم اختر افغان نے ڈسٹرکٹ جیل کوئٹہ کا اچانک دورہ کیا ،جسٹس محمد اعجاز سواتی اور جسٹس ظہیر الدین کاکڑ بھی چیف جسٹس کے ہمراہ تھے ،چیف جسٹس و دیگر ججز کی ڈسٹرکٹ جیل میں تمام قیدیوں سے ملاقاتیں کیں۔
چیف جسٹس بلوچستان ہائی کورٹ نے ماتحت عدلیہ کے تمام ججز کو زیرالتوا فوجداری مقدمات کی فائلوں سمیت ڈسٹرکٹ جیل کوئٹہ طلب کر لیا۔انہوں نے جیل وارڈ میں 5 عمر قید کے سزا یافتہ قیدیوں کو بلاجواز رکھنے پر جیل عملے کی سخت سرزنش کی اور قیدیوں کو فوراً سینٹرل جیل مچھ منتقل کرنے کے احکامات جاری کئے۔
چیف جسٹس نے قیدیوں کی ملاقات کے لئے مختص میٹنگ ہال غیر فعال ہونے پر برہمی کا اظہار کیا اور میٹنگ ہال کئی برس سے فعال نہ ہونے پر جیل سپرنٹنڈنٹ کو اظہار وجوہ کا نوٹس جاری کیا۔چیف جسٹس نے ڈسٹرکٹ جیل کوئٹہ میں قیدیوں کو فراہم کئے جانے والے کھانے کا معیار بھی چیک کیا اور قیدیوں کی بیرک میں ان کے ساتھ مل کر کھانا بھی کھایا۔
