لاہور،24 اگست(اے پی پی): وزیراعلیٰ پنجاب سردار عثمان بزدار اور چودھری محمد سرور کی گورنر ہاؤس میں ملاقات ہوئی، دونوں شخصیات نے سیاسی اور حکومتی معاملات پر گفتگو کے علاوہ وفاقی حکومت کے تین سال مکمل ہونے کے بعد وزیراعظم عمران خان کے دورہ لاہور کے انتظامات کے حوالے سے بھی بات چیت کی۔
انہوں نے عوام کو پینے کا صاف پانی فراہم کرنے کے پنجاب آب پاک اتھارٹی کے اقدامات کومزید تیز کرنے کا فیصلہ بھی کیا گورنرپنجاب نے صحت اور تعلیم سمیت دیگر شعبوں میں وزیر اعلیٰ عثمان بزدار کی حکومت کے تین سالہ اقدامات کو سراہتے ہوئے کہا کہ خواتین سے ظلم و زیادتی اور نااانصافی کے واقعات کے مجرموں کو جلد انکے انجام تک پہنچائیں گے۔
گورنر نے کہا کہ سیاسی مخالفین کا اپنا سیاسی مستقبل تاریک ہو چکا ہے وہ حکومت کیخلاف تحریک چلائیں گے اور 2023تک سیاسی مخالفین حکومت کے خلاف احتجاج کی تاریخ پر تاریخ دیتے ہی رہ جائیں گے، وزیراعظم عمران خان کی قیادت میں حکومت ملک کو آگے جبکہ اپوزیشن پیچھے لیکر جانا چاہتی ہے۔
وزیر اعلیٰ نے کہا کہ ملکی ترقی اور استحکام حکومت کی اولین ترجیح ہے وفاق اور پنجاب میں باتیں نہیں عملی کام ہورہا ہے، اپوزیشن کے غیر جمہوری ہتھکنڈوں کا جواب عوام کی خدمت سے دیں گےہم نے پنجاب کو ترقی کی راہ پر گامزن کردیا ہے، اپوزیشن خود انتشار کا شکار ہےپنجاب میں شہری اور دیہی علاقوں میں یکساں ترقیاتی منصوبوں پر کام ہورہے ہیں 3برس میں صوبے کی ترقی اور عوام کی خوشحالی کے لئے پائیدار اقدامات کئے ہیں۔
وزیر اعلی سردار عثمان بزدار نے مزید کہا کہ حکومت پہلے سے زیادہ مضبوط اور مستحکم ہے عوام باشعور ہیں اور اپوزیشن کے منفی پراپیگنڈا میں نہیں آئیں گے۔
