جدہ،04 ستمبر ( اے ہی پی ): جموں کشمیر اوورسیز کمیونٹی سعودی عرب کے زیر اہتمام سید علی گیلانی شہیدکو خراج عقیدت پیش کرنے کیلئے دعائیہ تقریب کا اہتمام کیا گیا، جس میں جدہ میں پاکستانی کمیونٹی نے بھر پور شرکت کی، جمںوں و کشمیر اوورسیز کمیونٹی کے چئیرمین خورشید متیال کی صدارت میں منعقد ہونے والی تقریب کے مہمان خصوصی قونصل جنرل پاکستان خالد مجید تھے۔
مقررین نے ممتاز کشمیری حریت رہنما سید علی گیلانی کے انتقال پر گہرے دُکھ اور افسوس کا اظہار کیا اور سید علی گیلانی کی کشمیری قوم کے لیے پیش کی جانے والی شاندار خدمات پر خراج تحسین پیش کرتے ہوئے کہا کہ علی گیلانی نے ہمیشہ کشمیری عوام کے حقِ خودارادیت کے لیے آواز بلند کی اور علالت کے باوجود قید و بند کی طویل صوبتیں برداشت کیں۔
مقررین نے کہا کہ سید علی گیلانی عظیم حریت پسند رہنما تھے، کشمیری عوام آج ایک عظیم لیڈر اور پاکستان ایک وفادار دوست سے محروم ہو گیا ہے،کشمیر کی جدوجہد آزادی کے لیے مرحوم کے جذبہ حریت کو تادیر یاد رکھا جائے گا۔
قونصل جنرل خالد مجید نے کہا کہ گیلانی صاحب کا نظریہ ہمیشہ قائم ودائم رہے گا، سید علی گیلانی بھارتی ریاستی دہشتگردی کے خلاف استقامت کا پہاڑ بنے رہے، پیرانہ سالی میں بھی ان کے حوصلے جواں تھے۔انہوں نے کہا کہ وہ مقبوضہ کشمیر میں نظریہ الحاق پاکستان کے امین اور داعی تھے، ان کی ناقابل فراموش جدوجہد پر پوری کشمیری قوم انھیں سلام عقیدت پیش کرتی ہے اور آج ہم یہ عزم کرتے ہیں کہ کشمیریوں کے حق خود ارادیت کے حصول تک سید علی گیلانی کا مشن جاری رکھیں گے۔
قونصل جنرل خالد مجید نے کہا کہ سید علی گیلانی کی رحلت پر پیدا ہونے والا خلا صدیوں پر نہیں کیا جا سکتا، آزادی کی تحریک آسان نہیں ہوتی، پاکستان اور کشمیری قوم اس نظریے کو لے کر آگے چلے گی ۔انہوں نے کہا کہ انشاء اللہ جلد کشمیری اپنا حق خود ارادیت حاصل کریں گے۔
چیئرمین جموں کشمیر اوورسیز کمیونٹی سعودی عرب چوہدری خورشید متیال نے کہا کہ پاکستان کشمیر کے بغیر نامکمل ہے، سید علی گیلانی مرحوم کی جدوجہد ہمارے لیے مشعل راہ ہے۔
اجلاس سے سردار اقبال ،سردار وقاص عنائت، راجہ شمروز لطیف عباسی،انجنئیر عارف مغل چیرمین پاکستان جرنلسٹس فورم امیر محمد خان پاکستان، اورسیرز میڈیا سے میاں محی الدین اور دیگر نے سید علی گیلانی مرحوم کو زبردست خراج تحسین پیش اور انکی خدمات کو سراہا اور لواحقین سے دلی تعزیت اور ہمدردی کا اظہار کیا۔
