اسلام آباد،7ستمبر (اے پی پی):صدر مملکت ڈاکٹر عارف علوی نے کہا ہے کہ حکومت اقلیتوں کی سماجی و معاشی ترقی کیلئے اقدامات کر رہی ہے،اقلیتوں کو تعلیم اور سرکاری ملازمتوں کے حصول کیلئے حوصلہ افزائی کی ضرورت ہے۔
ان خیالات کا اظہار انہوں نے چیلا رام کیولانی کی قیادت میں قومی اقلیتی کمیشن سے گفتگو کرتے ہوئے کیا جنہوں نے منگل کو یہاں ان سے ملاقات کی۔ صدر مملکت نے کہا کہ حکومت اقلیتوں کی عبادت گاہوں کی حفاظت اور دیکھ بھال کیلئے بھرپور کاوشیں کررہی ہے ۔ انہوں نے کہا کہ حکومت نے اقلیتوں کیلئے سرکاری نوکریوں میں پانچ فیصد کوٹہ مختص کیا، اقلیتوں کو تعلیم اور سرکاری ملازمتوں کے حصول کیلئے حوصلہ افزائی کی ضرورت ہے، اقلیتی رہنماء اپنی کمیونٹی میں نوجوانوں کو تعلیم اور سرکاری نوکریاں حاصل کرنے پر راغب کریں۔
صدر مملکت نے کہا کہ آئین پاکستان اقلیتوں کو برابری کے حقوق فراہم کرتا ہے، ریاست اقلیتوں کو قومی دھارے میں شامل کرنے کیلئے پر عزم ہے، ملکی ترقی کیلئے ایک جامع اور مساوات پر مبنی معاشرے کی تشکیل ناگزیر ہے ۔ انہوں نے کہا کہ حکومت اقلیتی برادری کے طلباء کو تعلیمی وظائف اور مالی امداد فراہم کررہی ہے، کامیاب جوان پروگرام کے تحت اقلیتی برادری کے نوجوان اور خواتین کاروبار کیلئے قرض حاصل کر سکتے ہیں۔
صدر مملکت ڈاکٹر عارف علوی کا کہنا تھا کہ بین المذاہب ہم آہنگی کے فروغ کیلئے مکالمے کی روایت عام کرنا ہوگی ۔انہوں نے کہا کہ امید ہے کہ قومی اقلیتی کمیشن بین المذاہب ہم آہنگی اور امن کے فروغ کیلئے اپنا کردار ادا کرتا رہے گا۔
وفد نے صدر مملکت کو اقلیتوں کو درپیش مسائل سے آگاہ کیا جس پر صدر مملکت نے وفد کو مسائل کے حل کیلئے کردار ادا کرنے کی یقین دہانی کرائی ۔ وفد نے اقلیتوں کے حقوق کے تحفظ کیلئے کاوشوں اور ذاتی دلچسپی پر صدر مملکت کے کردار کی تعریف کی ۔
