سکھر،04ستمبر(اے پی پی ): ملک کے دیگر شہروں کی طرح سکھر میں بھی چھ ستمبر یوم دفاع ، قومی جذبے کیساتھ منانے کے حوالے سے تقریبات ،ریلیوں و سمینار کا انعقاد کیا جارہا ہے۔ اس سلسلے میں افواج پاکستان سے اظہار یکجہتی اور خراج تحسین پیش کرنے کیلئے جناح ویلفیئر ایسوسی ایشن سکھر اور جمعیت علماءپاکستان سکھر کے زیر اہتمام بندر روڈ پر ریلی نکالی اور پاک افواج زندہ باد ، پاکستان زندہ باد ، کشمیر بنے گا پاکستان کی فلگ شگاف نعرے بازی کرتے ہوئے بھارتی پرچم نذر آتش کیا گیا ۔
شرکاءریلی نے ہاتھوں میں شہداءافواج پاکستان کو خراج تحسین پیش کرنے کیلئے تحریری بینرز سمیت قومی و کشمیری پرچم اٹھا رکھے تھے، ریلی کی قیادت جے یو پی کے رہنما مشرف محمود قادری ، جناح ویلفیئر کے اصلاح الدین شیخ کررہے تھے جبکہ ریلی میں مولانا نعمان خان،ڈاکٹر سعید اعوان سمیت معززین شہریوں نے شرکت کی۔
اس موقع پر مذکورہ رہنماؤں نے کہا کہ پاکستان کی سر زمین پر جب بھی کسی دشمن نے حملہ آور ہونے کی کوشش کی تو پاکستان کی بہادر افوا ج سمیت سندھ کی عوام نے بھی بندوق اٹھا کر اپنے وطن کے چپے چپے کا دفاع کیا، آج پوری قوم متحد ہو کر اپنے شہداءچھ ستمبر کو خراج تحسین پیش کررہی ہے۔ اختتام ریلی ملک کی سلامتی و خوشحالی کیلئے خصوصی دعا بھی کی گئی۔
