ملتان، 11 ستمبر(اے پی پی):شہر اولیاء میں صفائی و سیوریج سمیت ترقیاتی منصوبوں کی چیکنگ کا آغاز کر دیا گیا ہے۔ کمشنر ڈاکٹر ارشاد احمد نے ضلعی محکموں کے ہمراہ نشتر اطراف کا دورہ کیا اور سڑک پر موجود تعمیراتی ملبہ کو فوری ہٹانے کی ہدایت کی۔
سڑک پر ریڑھیاں، پھٹوں، تجاوزات پر کمشنر ملتان برہم ہوئے اور کہا کہ تجاوزات، گرین بیلٹس میں کچرے نے شہر کا حسن گہنا کر رکھ دیا ہے۔
کمشنر ڈاکٹر ارشاد احمد نے پیدل چل کر صفائی صورتحال کا جائزہ لیا اور واسا کو گٹروں کے ٹوٹے ڈھکن تبدیل،نکاسی آب یقینی بنانے کی ہدایت کی۔ کمشنر نے پی ایچ اے کو آرٹس کونسل پارک کی صفائی کی بھی ہدایت کی ۔
کمشنر ڈاکٹر ارشاد نے کہا کہ گرین بیلٹس کی صفائی، درختوں کی تراش خراش کی جائے اور شہر کے مختلف مقامات پر صفائی کی صورتحال کو بہتر بنایا جائے۔ انہوں نے کہا کہ شہریوں کو حکومتی اقدامات کے ثمرات نظر آنے چاہئیں ۔انہوں نے کہا کہ ہفتہ میں دو روز علی الصبح ڈویژن کے دورے کیلئے مختص کئے ہیں فیلڈ میں جاکر ازخود حالات دیکھنے پر یقین رکھتا ہوں ل۔
ڈاکٹر ارشاد احمد نے کہا شہراولیاء کے شہریوں کو صفائی،سیورج کی سروس ڈیلوری میں بہتری نظر آئے گی ۔ صفائی، سیورج، خوشگوار ماحول ہر شہری کا بنیادی حق ہے۔انہوں نے کہا کہ علی الصبح دوروں کا مقصد فیلڈ میں موثر مانیٹرنگ سے عوام کو ریلیف دینا ہے اور اعلانیہ دورہ کا مقصد محکموں کی استعداد کار کی جانچ ہے۔
