اسلام آباد۔1ستمبر (اے پی پی):وزیراعظم عمران خان نے اعلیٰ تعلیم کے فروغ کیلئے جاری اہم منصوبوں کو ترجیحی بنیادوں پر مکمل کرنے ، یونیورسٹیوں میں اعلیٰ تعلیم کو یقینی بنانے اور وفاق کی طرف سے مہیا کردہ مالی وسائل کے بہترین استعمال کیلئے نظام مرتب کرنے کی ہدایت کی ہے۔ بدھ کو وزیراعظم عمران خان کی زیر صدارت ملک میں اعلیٰ تعلیم کے فروغ سے متعلقہ معاملات پر جائزہ اجلاس منعقد ہوا۔ اجلاس میں وفاقی وزیر تعلیم شفقت محمود ، وفاقی وزیر اطلاعات و نشریات چوہدری فواد حسین ، وفاقی وزیر منصوبہ بندی اسد عمر ، معاون خصوصی ڈاکٹر شہباز گل، ڈپٹی چیئرمین منصوبہ بندی کمیشن اور دیگرسینئر افسران نے شرکت کی۔وزیراعظم آفس کے میڈیا ونگ سے جاری بیان کے مطابق اجلاس کو آگاہ کیاگیا کہ رواں مالی سال 2021-22 کے لئے ہائر ایجوکیشن کمیشن کوملک میں اعلیٰ تعلیم کے فروغ کے لئے 168 منصوبوں پر عملدرآمد کے لئے 42 ارب روپے مختص کئے گئے ہیں۔ان منصوبوں میں 29 ارب روپے مالیت کے 128 جاری منصوبے جبکہ 12 ارب روپے مالیت کے 40 نئے منصوبے شامل ہیں۔وزیر اعظم نے متعلقہ حکام کو ہدایت کی کہ اعلیٰ تعلیم کے فروغ کے لئے جاری اہم منصوبوں کو ترجیحی بنیادوں پر مکمل کیا جائے۔وزیراعظم نے ملکی وسائل کے موثر استعمال کو یقینی بنانے کی غرض سے ہائر ایجوکیشن کمیشن کی اعانت سے چلنے والے وظائف کے پروگرام کا جائزہ لینے کی ہدایت کی۔ وزیر اعظم نے صوبوں میں وفاقی حکومت کی معاونت سے چلنے والی مختلف یونیورسٹیوں میں اعلیٰ معیار تعلیم کو یقینی بنانے اوروفاق کی جانب سے مہیا کردہ مالی وسائل کے بہترین استعمال کے حوالے سے نظام مرتب کرنے کی بھی ہدایت کی۔ انہوں نے نظام تعلیم اور یونیورسٹیوں کے حوالے سے بھی جزا و سزا کا نظام متعارف کرانے کی ہدایت کی تاکہ اعلیٰ تعلیم کے فروغ کے لئے حکومتی پالیسیوں کا موثر طریقے سے نفاذ یقینی بنایا جا سکے۔وزیر اعظم نے تکنیکی اور پیشہ وارانہ تعلیمی نظام کے فروغ کی ضرورت پر بھی زور دیا تاکہ نوجوانوں کو جدید دور کے تقاضوں کے مطابق علم و ہنر سے آراستہ کرکے موجود مواقع سے استفادہ کرنے کے قابل بنایا جا سکے۔
