لاہور،20ستمبر(اے پی پی):وزیراعلیٰ پنجاب سردار عثمان بزدارسے صدر آزاد جموں و کشمیر بیرسٹرسلطان محمود چوہدری نے ملاقات کی اور سیاسی امور اورترقیاتی منصوبوں پر تبادلہ خیال کیا۔وزیراعلیٰ عثمان بزدارنے بیرسٹر سلطان محمود چوہدری کو آزاد جموں و کشمیر کا صدر منتخب ہونے پر مبارکباد دی، نیک خواہشات کا اظہار کیا۔
بیرسٹر سلطان محمود چوہدری نے آزاد کشمیر الیکشن میں بھرپورسپورٹ پر وزیراعلیٰ عثمان بزدار کا شکریہ ادا کیا۔
عثمان بزدار اور بیرسٹر سلطان محمود چوہدری نے مقبوضہ کشمیر میں بھارتی بربریت اور کشمیری عوام پر ظلم وستم کی مذمت کی۔
وزیراعلیٰ پنجاب سردار عثمان بزدار نے کہا کہ پاکستان تحریک انصاف کی آزاد کشمیر کے عام انتخابات میں شاندار کامیابی نے ثابت کیا ہے کہ عوام حکومتی پالیسیوں کا تسلسل چاہتے ہیں۔آزاد کشمیراب حقیقی معنوں میں ترقی اورخوشحالی کی راہ پر گامزن ہوگا۔ گلگت بلتستان کے بعد آزاد کشمیر میں بھی نئے پاکستان کی بنیاد رکھی جاچکی ہے۔
عثمان بزدار نے کہا کہ آزاد کشمیر الیکشن میں بھی شفافیت اور خدمت نے منفی سیاست کو شکست دی ہے۔انھوں نے کہا کہ مسلسل لاک ڈاؤن بھی کشمیری عوام کے جذبہ آزادی کو نہیں دبا سکا۔ مقبوضہ کشمیر میں بھارتی سرکار کی جبرو استبداد کی پالیسی مکمل ناکام ہوچکی ہے۔ بھارت اپنی آگ میں خود جل رہا ہے۔وہ دن دورنہیں جب بھارت کے کئی ٹکڑے ہوجائیں گے۔وزیر اعلیٰ پنجاب نے کہا کہ کشمیریوں کے ساتھ تھے، ہیں اورہمیشہ ساتھ رہیں گے۔ ہمارے دل کشمیر کیلئے اور کشمیریوں کے ساتھ دھڑکتے ہیں۔ترقی کے سفر میں پنجاب بڑے بھائی کی حیثیت سے آزاد کشمیر کا ساتھ دے گا۔
صدر آزاد کشمیر بیرسٹر سلطان محمود چوہدری نے کہا کہ بھارت نے مقبوضہ کشمیر کو جیل میں بدلا ہوا ہے۔ کشمیری عوام نے اپنے لہوسے آزادی کی شمع روشن کی ہوئی ہے۔بیرسٹرسلطان محمود چوہدری نے کہا کہ وزیراعظم عمران خان نے ہر فورم پر تنازعہ کشمیر کا مقدمہ جرات اوردلیل سے لڑا ہے۔پنجاب میں واضح تبدیلی نظر آرہی ہے،عثمان بزدار کی محنت رنگ لارہی ہیں۔بیرسٹر سلطان محمود چوہدری نے کہا کہ عثمان بزدار کا تمام علاقوں کی یکساں ترقی کا ویژن ہر لحاظ سے قابل تعریف ہے
