لاہور،21ستمبر (اے پی پی ) :وزیراعلیٰ پنجاب سردار عثمان بزدار سے ائیر آفیسر کمانڈنگ، سنٹرل ائیر کمانڈ،پاکستان ایئر فورس،ایئر وائس مارشل ظفر اسلم نے منگل کو یہاں ملاقات کی ہے،ملاقات میں وزیراعلیٰ سردار عثمان بزدار نے پاکستان ایئر فورس کی پیشہ وارانہ مہارت اور صلاحیتوں کو سراہتے ہوئے کہا کہ پاکستان ایئر فورس قوم کا قابل قدر اورقابل فخر ادارہ ہے، سماجی ترقی کیلئے پاکستان ایئر فورس کے تعاون کو قدر کی نگاہ سے دیکھتے ہیں۔
وزیراعلیٰ نے کہا کہ پنجاب میں پاکستان ایئر فورس کے تعاون سے تعلیمی ادارے قائم کیے جارہے ہیں۔انہوں نے کہا کہ وطن عزیز کی فضائی حدود کی حفاظت کا فریضہ سر انجام دینے کے ساتھ قومی تعمیر و ترقی کے شعبوں میں پاک فضائیہ کی بے مثال خدمات قابل تحسین ہیں، پاکستان ایئر فورس کی پیشہ وارانہ مہارت کو عالمی سطح پر تسلیم کیا جاتا ہے،پاک فضائیہ کے شاہینوں کی جرات اور بہادری پر ناز ہے۔
