اسلام آباد۔7ستمبر (اے پی پی):وزیر اعظم عمران خان نےکہا ہے کہ کراچی میں روزگار کیلئے محنت کشوں و افرادی قوت کی صنعتوں تک آسان رسائی حکومت کی اولین ترجیحات میں سے ایک ہے۔منگل کو وزیر اعظم میڈیا آفس سے جاری بیان کے مطابق وزیر اعظم سے وفاقی وزیر منصوبہ بندی و ترقی اسد عمر نے ملاقات کی۔وزیراعظم کو کراچی کی ترقی کے لیے جاری مختلف منصوبوں پر پیشرفت سے آگاہ کیا گیا۔وزیراعظم کو بتایا گیا کہ نیو کراچی سرکلر ریلوے کے آغاز کی منظوری کا عمل جلد مکمل کر لیا جائے گا۔ وزیر اعظم نے کہا کہ وفاقی حکومت پاکستان کے سب سے بڑے شہر میں لوگوں کو ٹرانسپورٹ کی سہولیات کی فراہمی یقینی بنائے گی،ماضی میں حکومتیں ملک کے اقتصادی مرکز کراچی کو نظر انداز کرتی رہیں۔ وزیرِ اعظم نےکہا کہ کراچی میں روزگار کیلئے مزدوروں و افرادی قوت کی صنعتوں تک آسان رسائی حکومت کی اولین ترجیحات میں سے ایک ہے۔
