لاہور،07 ستمبر(اے پی پی):گورنرپنجاب چوہدری محمدسرور سے وزیراعظم آزادکشمیر سردارعبد القیوم نیازی نےملاقات کی ۔وزیر اعظم آزادکشمیر اور گورنر پنجاب نے خطے میں امن کیلئے مسئلہ کشمیر کے حل کوفوری طور لازم قراردیدیا اور انہوں نے آزاد کشمیر میں بھی اورسیز کمیشن کے قیام پر بھی غورکیا۔
گور نر پنجاب چوہدری محمدسرور نے آزادکشمیر میں صحت سمیت تمام شعبوں میں مکمل تعاون کی یقین دہانی کروائی۔ملاقات میں گفتگو کرتے ہوئے وزیراعظم آزاد کشمیر سردار عبد القیوم نیازی نے کہا کہ وزیر اعظم عمران خان کی قیادت میں ہم آزادکشمیر کو مضبوط اور خوشحال بنائیں گے۔انہوں نے کہا کہ بھارت کا سید علی گیلانی کے انتقال کے معاملے پر شر مناک کردار سامنے آیا ہے۔بندوق اور گولی کی طاقت سے بھارت کشمیر یوں کی آواز کو کسی صورت نہیں دبا سکتا، کشمیری عوام جرات کے ساتھ اپنی آزاد ی کی جد وجہد کر رہی ہے انشاء اللہ وہ کامیاب ہوں گے۔
اس موقع پر گورنر پنجاب چوہدری محمد سرور نے کہا کہ آزادکشمیر کے عوام کو بھی ریسکیو 1122کی سروس کی فراہمی کیلئے پنجاب مکمل سپورٹ کر ے گا ۔بھارت سفارتی سطح پر دنیا میں تنہا اور بے نقاب ہوچکا ہے ہم کشمیر یوں کیساتھ کھڑے ہیں نریندر مودی اور بھارتی افواج کشمیر میں دنیا کی سب سے بڑی دہشت گردی کر رہا ہے۔انہوں نے کہا کہ جب تک مسئلہ کشمیر حل نہیں ہوگا خطے میں امن کے قیام کا خواب پورا نہیں ہوسکتا، وزیر اعظم عمران خان حقیقی معنوں میں کشمیریوں کے سفیر بن کر ان کا مقدمہ لڑ ررہے ہیں۔ افغانستان میں امن بھی بھارت سے برداشت نہیں ہورہا مگروہ ناکام ہوگا۔
