لاہور، ستمبر 2(اے پی پی): وزیراعلیٰ پنجاب سردار عثمان بزدار سے چیئرمین سپیشل ٹیکنالوجی زونز اتھارٹی کے وفد نے ملاقات کی۔اس ملاقات میں لاہور میں سپیشل ٹیکنالوجی زون بنانے کے اصولی فیصلے سمیت سپیشل ٹیکنالوجی زون کے منصوبے کی جلد تکمیل کے لئے جوائنٹ ونچر گروپ قائم کرنے کی منظوری دی گئی۔
وزیر اعلی عثمان بزدار نے سپیشل ٹیکنالوجی زون کے قیام کے منصوبے پر جلد ازجلد پیشرفت کی ہدایت کرتے ہوئے کہا کہ پنجاب میں سپیشل ٹیکنالوجی زون کے قیام سے ترقی و خوشحالی کا انقلاب آئے گا نوجوان معاشی خودمختاری کی راہ پر گامزن ہوں گے اور آئندہ نسلوں کی معاشی بقاء کے لئے ٹیکنالوجی کا فروغ بہت ضروری ہے۔
انہوں نے کہا کہ سپیشل ٹیکنالوجی زون میں غیر ملکی سرمایہ کاروں کو تمام ممکنہ سہولتیں دیں گے، ٹیکنالوجی زون میں ایگری ٹیک سافٹ ویئر اور دیگر سافٹ پراڈکٹس تیار کی جا سکیں گی، لاہور کے بعد بہاولپور، رحیم یار خان، ملتان اور ڈیرہ غازی خان سمیت دیگر شہرو ں میں بھی مرحلہ وار سپیشل ٹیکنالوجی زون قائم کئے جائیں گے، ٹیکنالوجی بیسڈانویسٹمنٹ کے لئے حکومت پنجاب آسانیاں پیدا کرے گی۔
اس موقع پر صوبائی وزیر خزانہ ہاشم جواں بخت، چیف سیکرٹری، پرنسپل سیکرٹری وزیراعلیٰ، سیکرٹری صنعت،سپیشل مانیٹرنگ یونٹ کے سربراہ،سپیشل ٹیکنالوجی زونز اتھارٹی کے ایگزیکٹو ڈائریکٹر عامر سلیمی، ڈائریکٹر پلاننگ اینڈ سٹریٹجک کمیونیکیشنز حمزہ سعید اورکزئی اور ڈی جی آئی ٹی عبدالرحیم بھی موجود تھے۔
