نیویارک ، 24 ستمبر (اے پی پی ): وزیر خارجہ مخدوم شاہ محمود قریشی نے کہا ہے کہ پاکستان انڈونیشیا کے ساتھ اپنے برادرانہ تعلقات کو بہت اہمیت دیتا ہے اور سیاسی ، تجارتی ، اقتصادی اور باہمی دلچسپی کے تمام شعبوں میں تعاون بڑھانے کا خواہاں ہے۔
ان خیالات کا اظہار وزیر خارجہ مخدوم شاہ محمود قریشی نے جمعہ کو یہاں اقوام متحدہ جنرل اسمبلی کے چھہترویں اجلاس کے موقع پر انڈونیشیا کی وزیر خارجہ ریٹنو مرسودی کے ساتھ ملاقات میں کیا۔
وزیر خارجہ مخدوم شاہ محمود قریشی نے پاکستان اور انڈونیشیا کے درمیان اقتصادی تعلقات کو وسعت دینے کی ضرورت پر زور دیا اور کہا کہ پاکستان، وزیر اعظم عمران خان کے وژن کی روشنی میں اقتصادی ترجیحاتی ایجنڈے پر گامزن ہے۔
انڈونیشیا کی وزیر خارجہ نے کابل سے، انڈونیشین سفارتی عملے کے محفوظ انخلاء میں سہولت کی فراہمی پر وزیر خارجہ مخدوم شاہ محمود قریشی اور پاکستان کی قیادت کا شکریہ ادا کیا۔
ملاقات میں دوطرفہ تعلقات کے تمام پہلوؤں پر تبادلہ خیال ہوا۔ دونوں وزرائے خارجہ نے اقوام متحدہ ، آسیان اور دیگر بین الاقوامی فورمز پر دو طرفہ تعاون کے فروغ پر اتفاق کیا اور دونوں ملکوں کے درمیان اعلیٰ سطحی روابط کے فروغ کی ضرورت پر زور دیا۔
ملاقات میں پاکستان اور انڈونیشیا کے مابین دو طرفہ سیاسی تعلقات کو مزید مستحکم بنانے، اقتصادی تعاون کو وسعت دینے اور عوام کی سطح پر روابط کے فروغ پر بھی اتفاق کیا گیا۔
