نیویارک،22ستمبر (اے پی پی ): وزیر خارجہ مخدوم شاہ محمود قریشی نے کہا ہے کہ پاکستان، آئرلینڈ کے ساتھ دو طرفہ تعلقات کو خصوصی اہمیت دیتا ہے۔ پاکستان اور آئرلینڈ کے درمیان تجارت، سرمایہ کاری، ماحولیات، صحت، قابلِ تجدید توانائی ،زراعت، سیاحت اور ٹیکنالوجی کے شعبہ جات میں دو طرفہ تعاون بڑھانے کے وسیع مواقع موجود ہیں۔
ان خیالات کا اظہار وزیر خارجہ نے بدھ کو یہاں اقوام متحدہ جنرل اسمبلی کے چھہترویں اجلاس کے موقع پر آئرلینڈ کے وزیر خارجہ و دفاع سائمن کوونے (Simon Coveney) کے ساتھ ملاقات میں کیا۔دونوں وزرائے خارجہ کے مابین دو طرفہ تعلقات، مختلف شعبہ جات میں دو طرفہ تعاون کے فروغ اور افغانستان کی ابھرتی ہوئی صورتحال پر تبادلہ خیال کیا گیا ۔
مخدوم شاہ محمود قریشی نے کہا کہ آئرلینڈ، یورپی یونین کا اہم ملک ہے، آئرلینڈ میں کثیر تعداد میں مقیم پاکستانی کمیونٹی، دونوں ممالک کے درمیان تعلقات کے استحکام میں ایک پُل کا کام کرتی ہے۔
دونوں وزرائے خارجہ نے پاکستان اور آئرلینڈ کے درمیان دو طرفہ سیاسی مشاورتی میکنزم کو فعال بنانے اور اعلیٰ سطحی روابط کو بڑھانے کی ضرورت پر زور دیا۔وزیر خارجہ نے موثر انداز میں کرونا وبا کے پھیلاؤ کو روکنے میں کامیابی پر آئرلینڈ حکومت کی حکمت عملی اور کاوشوں کو سراہا اور جی ایس پی پلس اسٹیٹس کے حوالے سے پاکستان کی حمایت پر آئرلینڈ کی قیادت کا شکریہ ادا کیا۔
وزیر خارجہ نے پاکستان میں وبائی اور سیکورٹی صورتحال میں بہتری کو پیش نظر رکھتے ہوئے، ٹریول ایڈوایزری پر نظرثانی کے اقدام کی بھی تعریف کی۔
دونوں وزرائے خارجہ نے افغانستان کی موجودہ صورتحال پر تبادلہ ء خیال کرتے ہوئے، افغانوں کو ممکنہ انسانی بحران کے خطرے سے بچانے کیلئے، عالمی برادری کی جانب سے انسانی معاونت کی فراہمی کو یقینی بنانے پر زور دیا
