اسلام آباد،30ستمبر (اے پی پی):وزیر اعظم عمران خان نے متعلقہ حکام کو ہدایت کی ہے کہ فعال حکمت عملی اختیار کرتے ہوئے مسائل حل کئے جائیں تاکہ پاکستان براہ راست غیر ملکی سرمایہ کاری کو راغب کرکے راوی اربن ڈویلپمنٹ اتھارٹی اور سنٹرل بزنس ڈسٹرکٹ جیسےان جدید اور پائیدار رئیل اسٹیٹ منصوبوں سے زیادہ سے زیادہ فوائد حاصل کر سکے۔
ان خیالات کا وزیر اعظم عمران خان نے راوی اربن ڈویلپمنٹ اتھارٹی (روڈا) اور سنٹرل بزنس ڈسٹرکٹ (سی بی ڈی)،والٹن سے متعلق جائزہ اجلاس کی صدارت کرتے ہوئے کیا۔روڈا کے مختلف منصوبوں میں شمسی توانائی سے چلنے والا قابل تجدید بجلی پیدا کرنے والے پلانٹ کی تنصیب ، خصوصی اقتصادی زونز اور خصوصی ٹیکنالوجی زونز کا قیام ، فیری آپریشنز کا آغاز ، نالج پارک اور رکھ جھک فارمز کا قیام شامل ہیں۔یہ تمام منصوبے اپنی مالی ضروریات کے حوالے سے خود مختار ہوں گے، تاکہ ان کی پائیداری کو یقینی بنایا جا سکے۔
وزیراعظم کو آئی ایم جی دبئی تھیم پارک کے اشتراک سے پاکستان کا سب سے بڑا تھیم پارک بنانے کےمنصوبے پر بھی بریفنگ دی گئی۔راوی ریور فرنٹ پر 2000 کنال اراضی پر بنایا جانے والایہ منصوبہ (آر یو ڈی اے) سرمایہ کاروں کو راغب کرنے کے لیے آئندہ ماہ شروع ہونے والی دبئی ایکسپو 2020 میں نمائش کے لیے پیش کرے گا۔
وزیراعظم نے ملک میں سمارٹ ، خود کفیل، صاف ستھرے اور سبز مکانات اور کاروباری منصوبوں کے فروغ کے لیے آریوڈی اے اور سی بی ڈی کی اہمیت پر زور دیا۔انہوں نے متعلقہ حکام کو ہدایت کی کہ وہ ایک فعال حکمت عملی اپناتے ہوئے مسائل کو حل کریں تاکہ پاکستان براہ راست غیر ملکی سرمایہ کاری کو راغب کرکے ان جدید اور پائیدار رئیل اسٹیٹ منصوبوں سے زیادہ سے زیادہ فوائد حاصل کر سکے۔
