اسلام آباد۔11اکتوبر (اے پی پی):وزیراعظم عمران خان نے خصوصی اقتصادی زونز میں زمین کی فراہمی ، بجلی اور گیس کے کنکشن کی دستیابی اور ٹیکس مراعات دینے کے حوالے سے ہر ممکن اقدامات یقینی بنانے کی ہدایت کی ہے ۔پیر کو وزیراعظم عمران خان کی زیر صدارت خصوصی اقتصادی زونز میں چینی سرمایہ کاروں کی سہولت کے حوالے سے اجلاس ہوا ۔وزیراعظم نے اجلاس سے خطاب کرتے ہوئے کہا کہ پاکستان میں صنعتی ترقی کو تیز کرنے کے لیے سرمایہ کاری کی ضرورت ہے،بیرونی سرمایہ کاری بڑھتی ہوئی آبادی کے لیے روزگار کے مواقع پیدا کرنے میں معاون ثابت ہوگی۔ وزیراعظم نے متعلقہ حکام کو خصوصی اقتصادی زونز میں زمین کی فراہمی، بجلی اور گیس کے کنکشن کی دستیابی اور ٹیکس مراعات دینے کے حوالے سے ہر ممکن اقدامات کرنے کی ہدایت کی، تاکہ زیادہ سے زیادہ چینی کمپنیاں پاکستان میں سرمایہ کاری کریں اور اقتصادی زونز کو جلد فعال کیا جاسکے۔وزیر اعظم کو بتایا گیا کہ ملک میں کل 27 خصوصی اقتصادی زونز ہیں جن میں سے 5زونز جن میں سندھ میں دھابیجی ، کے پی کے میں رشکئی ، بلوچستان میں بوستان ، پنجاب میں علامہ اقبال انڈسٹریل سٹی اور بلوچستان میں گوادرشامل ہیں ، پر کام تیزی سے جاری ہے۔ مزید برآں ممکنہ چینی سرمایہ کاروں کے تمام مسائل کو ایک چھت تلے حل کرنے کے لیے ان میں سے ہر ایک زون میں ایک موثر ون ونڈو آپریشن سہولت اور سی پیک اتھارٹی میں ایک سہولت مرکز قائم کیا جا رہا ہے۔
