لاہور،7اکتوبر(اے پی پی): وزیراعلیٰ پنجاب سردار عثمان بزدار نے کہا کہ ہماری سمت درست اور نیت نیک ہے، پنجاب میں پسماندہ علاقوں کو ترقی کی دوڑ میں شامل کیا ہے،راولپنڈی کے مسائل کے حل کیلئے ہر ممکن اقدام اٹھائیں گے۔
ان خیالات کا اظہار وزیراعلیٰ پنجاب سردار عثمان بزدار نے وفاقی وزیرداخلہ شیخ رشید احمد سے ملاقات میں کیا۔ ملاقات میں باہمی دلچسپی کے امور،سیاسی صورتحال اورراولپنڈی کے ترقیاتی پراجیکٹس پرتبادلہ خیال کیااورعثمان بزدار اورشیخ رشید کا بلوچستان میں زلزلے سے قیمتی انسانی جانوں کے ضیاع پر اظہار افسوس بھی کیا۔
وزیر اعلیٰ پنجاب نے کہا کہ مخالفین نے تین برس میں صرف پراپیگنڈا کیا ہے، ماضی کی حکومتوں نے میرٹ کے نام پر اقرباء پروری کے کلچر کو فروغ دیا۔سابق ادوار کی غلط پالیسیوں کے باعث قومی خزانے کو نقصان پہنچا،جس کا خمیازہ عوام کو بھگتنا پڑا۔انہوں نے کہا کہ سابق حکمرانوں نے منصوبوں کے نام پرقومی وسائل کا بے دریغ ضیاع کیا اور عوام کی بنیادی ضرورتوں کو نظرانداز کیا۔
وفاقی وزیر داخلہ شیخ رشید احمد نے کہا کہ وزیراعلیٰ عثمان بزدار کی قیادت میں پنجاب حکومت نے کورونا کا پھیلاؤ روکنے کے لئے عملی اقدامات کئے ہیں -کرپشن کرنے والوں کا مستقبل تاریک ہوچکاہے۔انہوں نے کہا کہ پی ڈی ایم کی منفی سیاست ختم ہوچکی ہے۔
