لاہور، 11 اکتوبر (اے پی پی):وزیر اعلی پنجاب سردار عثمان خان بزدار کی زیر صدارت منعقد ہونے والے اعلی سطحی اجلاس میں بارڈر ملٹری پولیس اور بلوچ لیویز کی استعداد کار بڑھانے کا فیصلہ کیا گیا۔اجلاس میں بارڈرملٹری پولیس اور بلوچ لیویز کے امور کا جائزہ بھی لیا گیا۔
وزیر اعلی نے کہا کہ قبائلی عوام کے تحفظ کیلئے بارڈر ملٹری پولیس اوربلوچ لیویز کو پیشہ وارانہ تربیت دی جائے گی، ڈیرہ غازی خان اور راجن پور کے قبائلی علاقوں کے عوام کاتحفظ یقینی بنائیں گےاور اس کے لئے بارڈر ملٹری پولیس اور بلوچ لیویز کے انفراسٹرکچر کو بھی بہتر بنائیں گے۔انہوں نے ہا کہ بارڈر ملٹری پولیس اور بلوچ لیویزکو جدید اسلحہ دیاجائے گا۔
وزیراعلیٰ عثمان بزدار کی جانب سے بارڈر ملٹری پولیس میں بھرتیوں کاعمل جلد مکمل کرنے کی ہدایت بھی کی گئی اور بلوچ لیویز کی کمانڈ پنجاب پولیس کے افسر کو دینے کا فیصلہ بھی کیا گیا۔وزیر اعلیٰ نے ہدایت کی کہ بھرتیوں کا عمل شفاف طریقے سے مکمل کیا جائے۔ انہوں نے کہا کہ بارڈر ملٹری پولیس اور بلوچ لیویز کو عوام کے جان ومال کی حفاظت کے لئے ممکنہ وسائل فراہم کریں گے۔
اعلی سطحی اجلاس کے موقع پر معاون خصوصی برائے اطلاعات حسان خاور،چیف سیکرٹری،انسپکٹر جنرل پولیس، ایڈیشنل چیف سیکرٹری داخلہ،پرنسپل سیکرٹری وزیراعلیٰ اورکمشنر ڈیرہ غازی خان ڈویژن بھی موجود تھے۔
