اسلام آباد، 24 نومبر(اے پی پی):امریکہ میں ڈیموکریٹک پارٹی کے سینئر رہنما ڈاکٹر آصف محمود کی وزارتِ خارجہ میں وزیر خارجہ مخدوم شاہ محمود قریشی سے بدھ کو ملاقات ہوئی۔ملاقات میں پاک امریکہ تعلقات، اقتصادی تعاون کے فروغ سمیت باہمی دلچسپی کے امور پر تبادلہء خیال کیا گیا۔
وزیر خارجہ مخدوم شاہ محمود قریشی نے کہا کہ خطے میں امن و استحکام اور تعمیر و ترقی کیلئے پاکستان اور امریکہ کا باہمی تعاون ہمیشہ مثبت نتائج کا موجب رہا ہے، پاکستان، اقتصادی ترجیحاتی ایجندے پر عمل پیرا ہے، امریکہ، پاکستان کی سب سے بڑی برآمدی منڈی ہے، امریکی کمپنیاں، 200 ملین آبادی پر مشتمل پاکستان کی ابھرتی ہوئی مارکیٹ میں سرمایہ کاری کر کے بہترین منافع کما سکتی ہیں۔
وزیر خارجہ نے کہا کہ پاکستان کے دورے پر آئے ہوئے ایوان نمائندگان میں امور خارجہ کمیٹی کے چیئرمین گریگوری میکس اور گانگرس مین ایمی بیرا سے ہونے والی ملاقات انتہائی سود مند رہی ہے۔
پاکستانی نژاد ڈیموکریٹک رہنما ڈاکٹر آصف محمود نے کابل سے امریکی شہریوں کے محفوظ انخلاء میں پاکستان کی بھرپور معاونت پر وزیر خارجہ مخدوم شاہ محمود قریشی اور پاکستانی قیادت کا شکریہ ادا کیا۔
