جلالپورپیروالا، 17 نومبر ( اےپی پی): جلالپورپیروالا میں یوریا اور ڈی اے پی کھاد کی بلیک میں فروخت کرنے اور مصنوعی بحران کی میڈیا پر خبر نشر ہونے اور عوامی شکایات پر اسسٹنٹ کمشنر طارق محمود نے پولیس،سپیشل برانچ کی نشاندہی پر سول ڈیفینس عملے کے ہمراہ محلہ شور کوٹ، ظاہر پیر ،پرمٹ روڈ سمیت مختلف مقامات پر چھاپے مارے دوران کارروائی سٹاک کرکے چھپائی گئی یوریا اور ڈی اے پی کھاد کی 6 سو سے زائد بوریاں برآمد کرلیں اور دونوں گوداموں کو سیل کردیا ۔ کھاد کا مصنوعی بحران پیدا کرنے اور بلیک میں فروخت کرنے والے تاجروں کو لاکھوں کے جرمانے بھی کیے گئے دوسری طرف میڈیا بریفنگ کے دوران اسسٹنٹ کمشنر طارق محمود کا کہنا تھا کہ حکومتی ہدایات پر کھاد کا مصنوعی بحران پیدا کرنے والوں اور بلیک میں فروخت کرنے والوں کے خلاف سخت اقدامات اٹھارہے ہیں اور ایسے عناصر سے آہنی ہاتھوں کے ساتھ نمٹا جائے گا ملک میں کسی چیز کا بحران نہیں ہے چند عناصر ناجائز کمائی کی آڑ میں ایسے ہتھکنڈے استعمال کررہے ہیں جن کی خلاف کاروائیاں جاری ہیں۔ انہوں نے اپیل کی کہ عوام ایسے عناصر کی فوری انفارمیشن دیں تاکہ ان کے خلاف کارروائی کی جاسکے۔
