اسلام آباد،10نومبر (اے پی پی):وفاقی وزیر صنعت و پیداوار خسرو بختیار نے کہا ہے کہ نئی پالیسی وزیر اعظم عمران خان کے وژن کے مطابق چھوٹے و درمیانے درجے کے کاروبار کو بڑھانے کیلئے مرتب کی گئی ہے، ایس ایم ای پورٹل کو کاروبار کی وسعت، این او سی کے حصول میں آسانی پیدا ہو گی۔
ان خیالات کا اظہار انہوں نے بدھ کو نئی ایس ایم ای پالیسی کے حوالے سے کامرس چیمبرز کے صدور اور دیگر کاروباری شخصیات سے اہم اجلاس کی صدارت کرتے ہوئے کیا۔اجلاس میں مجوزہ ایس ایم ای پالیسی کے اہم مندرجات پر شرکا کو بریفنگ دی گئی،شرکا کو پالیسی کے تحت آسان قرضوں کی فراہمی،نو آڈٹ اور ٹیکس چھوٹ سے متعلق تفصیلات سے آگاہ کیا گیا ۔ ایس ایم ایز سٹیک ہولڈرز نے وزیر صنعت وپیداوار مخدوم خسرو بختیار کی پالیسی کیلئے رابطہ اجلاس کو سراہا ۔
اس موقع پر وفاقی وزیر خسرو بختیار نے کہا کہ نئی پالیسی کے تحت ایس ایم ای کارڈ کا اجراء کیا جائے گا،ایس ایم ای کارڈ کے ذریعے کاروباری حضرات ٹیکس ریلیف اور آسان شرائط پر قرض لے سکیں گے۔ انہوں نے کہاکہ نئی پالیسی کے تحت ایس ایم ای پورٹل بھی لانچ کر دیا گیا ہے،ایس ایم ای پورٹل کو کاروبار کی وسعت، این او سی کے حصول میں آسانی پیدا ہو گی۔انہوں نے کہاکہ نئی ایس ایم ای پالیسی سے ہر قسم کا چھوٹے و درمیانے درجے کا کاروبار مستفید ہو گا،۔
انہوں نے کہا کہ ایس ایم ایز کیلئے پلگ این پلے کی بنیاد پر انڈسٹریل زونز میں پلاٹس مختص کر دیے ہیں،ایس ایم ایز کے کاروبار کو وسعت کیلئے ایک فنڈ تشکیل دیا جائے گا۔
خسرو بختیار نے کہا کہ خواتین سے منسلک کاروبار کو وسعت دینے کیلئے نئی پالیسی میں خصوصی مراعات دی جائے گی، پنجاب میں ایس ایم ایز کیلئے ای انسپیکشن پورٹل کا اجراء کر دیا ہے۔پالیسی میں ایس ایم ایز ایکسپورٹرز کو سہولیات فراہم کی جائے گی، برآمدی ایس ایم ایز کیلئے مشترکہ گودام کا آغاز کیا جائے گا۔
انہوں نے کہا کہ آئی ٹی اور گارمنٹ صنعتوں کو فروغ دینے کیلئے اقدامات کئے جا رہے ہیں،پاکستانی مصنوعات کی عالمی سطح پر مارکیٹنگ کیلئے اقدامات کئے جائیں گے جبکہ پاکستانی کاروباری افراد کو عالمی منڈی میں رسائی حاصل کرنے کیلئے معاونت کی جائے گی۔
اجلاس میں مشیر تجارت عبدالرزاق داؤد نے بھی شرکت کی۔
