لاہور،30نومبر ( اے پی پی): وزیراعلیٰ پنجاب سردارعثمان بزدار کی مجلس ترقی ادب کے آفس آمد،وزیراعلیٰ عثمان بزدار نے پنجاب کے پہلے لاہورادبی عجائب گھر ادبی بیٹھک اورچائے خانے کا بھی افتتاح کیا۔وزیراعلیٰ عثمان بزدار نے ای لائبریری بلاک کے منصوبے کا سنگ بنیاد رکھا اور لاہور ادبی عجائب گھر کا دورہ کیا۔
وزیراعلیٰ عثمان بزدار نے لاہور ادبی عجائب گھر میں شاعر مشرق علامہ اقبالؒ،معروف شعراء اور دانشوروں کی رکھی اشیاء دیکھیں اور معروف شعراء کی تاریخی اشیاء میں گہری دلچسپی کااظہار کیا اور ادبی بیٹھک اورچائے خانے کا بھی دورہ کیا۔
سیکرٹری اطلاعات و ثقافت نے وزیراعلیٰ عثمان بزدار کو بریفنگ دی صوبائی وزیر ثقافت خیال احمد کاسترو، ترجمان پنجاب حکومت حسان خاور،پرنسپل سیکرٹری وزیراعلیٰ،ڈائریکٹر مجلس ترقی ادب منصور آفاق،ڈپٹی کمشنر،دانشوروں،شعراء،ادیبوں او رصحافیوں کی بڑی تعداد بھی اس موقع پر موجود تھی۔
اس موقع پر وزیراعلیٰ عثمان بزدار نے ادیبوں،شاعروں اور دانشوروں سے ملاقات کی اور کہا کہ تحریک انصاف کی حکومت نے ادیبوں اور شاعروں کی فلاح و بہبود کے لئے متعدد اقدامات کئے ہیں مجلس ترقی ادب کے زیراہتمام پنجاب بھر کے ادیبوں اور شاعروں کو ممبرشپ کارڈ جاری کیا جا رہا ہے،اس اقدام سے ادیبوں اور شاعروں کی رائٹر ویلفیئر فنڈ سے مالی معاونت ممکن ہو گی،ادیب و شاعر نگارخانہ کتب سے رعایتی نرخ پر کتابیں بھی حاصل کر سکیں گے،ادیب و شاعر مجلس کتاب گھر کی قدیم کتابوں سے استفادہ کر سکیں گے اور آئندہ رائٹر ویلفیئر کی کسی بھی سکیم سے مستفید ہو سکیں گے۔
وزیراعلیٰ پنجاب سردارعثمان بزدار نے کہا کہ یونیسکو نے لاہور کو سٹی آف لٹریچرقرار دیا ہےاسی حوالے سے شہر میں لاہور لٹریری پارک کا قیام عمل میں لایا جا رہا ہے،مجلس ترقی ادب کے زیراہتمام ہر سال شاعری اور نثر کی منتخب کتابوں پر ایوارڈ دئیے جائیں گے۔انہوں نے کہا کہ سب سے اعلیٰ نثر، سب سے اعلیٰ نظم اور سب سے اعلیٰ غزل پر بھی ایوارڈ دیا جائے گا،حکومت پنجاب فروغ ادب کے لئے اردو زبان کا پہلا ای ریڈر پیش کر رہی ہے جس میں ابتدائی طور پر 10ہزار کتابیں شامل ہوں گی پہلی مرتبہ قلمی نسخوں کی باقاعدہ لائبریری کا قیام عمل میں لایا گیا ہے،قلم نگار کی لائبریری میں ہر قلمی نسخے کی پانچ کاپیاں رکھی جائیں گی، یہ قلمی نسخے آن لائن بھی شائقین ادب کے لئے میسر ہوں گے۔
وزیراعلیٰ عثمان بزدار کو مجلس ترقی ادب کی جانب سے سووینئر پیش کیاگیا۔
