ملتان،7نومبر (اے پی پی):وزیر خارجہ مخدوم شاہ محمود قریشی نے کہاہے کہ پی ڈی ایم بیرونی ایجنڈے پر کام کررہی ہے۔ پی ڈی ایم کی جماعتیں فیڈریشن کی مخالف ہیں۔ اس میں شامل جماعتوں کا نہ تو کوئی نظریہ ہے اور نہ کوئی ایجنڈا ۔ لانگ مارچ ہو یا شارٹ مارچ گھبرانے والے نہیں ۔ پی ڈی ایم احتجاج اور مارچ کا شوق پورا کرے۔ ماضی کی تحریکوں کی طرح اس دفعہ بھی پی ڈی ایم کو مایوسی ہوگی۔ حکومت گرانے کی خواہش ‘ خواہش ہی رہے گی۔تحریک انصاف واحد سیاسی جماعت ہے جو فیڈریشن کی حامی اور قومی سیاسی جماعت ہے۔ جس کا ایجنڈا قومی اور جس کی جڑیں پورے ملک میں پھیلی ہوئی ہیں۔ حکومت اپنی آئینی مدت پوری کریگی۔ اسمبلی سے باہر بیٹھنے والے وقت کا انتظار کریں۔ 2023ءکے انتخابات میں بھی تحریک انصاف اقتدار میں آئیگی۔
ان خیالات کا اظہار انہوں نے این اے 156 میں سورج کنڈ روڈ اور سوئی گیس روڈ کی تکمیل کے منصوبے کی افتتاحی تقریب سے خطاب کرتے ہوئے کیا۔ سورج کنڈ روڈ کو ایک سال کی مدت میں 23 کروڑ 50 لاکھ روپے ، جبکہ سوئی گیس روڈ کو 18کروڑ کی لاگت سے مکمل کیا گیا ہے۔انہوں نے این اے 156 کی مختلف یونین کونسلوں 45،46،47اور 56 میں 20 سے زائد مقامات پر ٹف ٹائل ، سیوریج ، کارپیٹڈ روڈ کی تکمیل کے منصوبوں کا بھی افتتاح کیا۔
تقاریب سے خطاب کرتے ہوئے وزیر خارجہ مخدوم شاہ محمود قریشی نے کہاکہ تحریک انصاف کو کمزور ملکی معیشت ورثے میں ملی ، اقتدار ملا تو خزانہ خالی اور ملک قرضوں میں ڈوبا ہوا تھا ،ملک کو اندرون و بیرونی سطح پر بحرانوں کا سامنا تھا، ابھی بھی ہمارے سامنے بہت سے چیلنجز ہیں جن کا ہم نے مقابلہ کرنا ہے،مہنگائی بھی ہمارے لئے ایک بہت بڑا چیلنج ہے،مہنگائی ایک عالمی مسئلہ ہے ۔انہوں نے کہا کہ کورونا کے بعد پوری دنیا اس وقت مشکلات میں ہے، سب کو مہنگائی کے چیلنجز کا سامنا کرنا پڑ رہاہے، صرف پاکستان میں اس کا تاثر دینا غلط ہے، عالمی سطح پر پیٹرولیم منصوعات کی قیمتو ںمیں اضافہ اور اشیاءخوردونوش کی چیزوں کی قیمتوں میں اضافہ کا اثر پاکستان میں بھی ہوا ہے،اس وقت ہماری پہلی ترجیح عوام کو عالمی سطح پر مہنگائی کے رجحان کے اثرات سے بچانا اور اس کیلئے حکومت کوئی کسر اٹھا نہیں رکھے گی۔ہم موجودہ حالات سے ہرگز مایوس نہیں بلکہ مشکل کی گھڑی سے تقویت لے کر سر خرو ہوں گے، حکومت مشکل معاشی حالات کے باوجودمثبت پیشرفت کر رہی ہے، پاکستان میں معیشت کی ترقی میں تیزی سے اضافہ ہو رہا ہے۔
وزیر خارجہ مخدوم شاہ محمود قریشی نے کہاکہ وزیراعظم عمران خان کی خواہش ہے کہ پاکستان کا ہر شہری سر اٹھا کر چلے، وہ پاکستان کے نوجوانو ںکو ایک اچھا مستقبل فراہم کرنا چاہتے ہیں، ان کی خواہش ہے پاکستان کا ہر شہری خود روزگار کما کر اپنی اور اپنے خاندان کی کفالت کرے ، کامیاب جوان پروگرام کے تحت 23 ارب مالیت کے قرضے نوجوانوں میں تقسیم کئے گئے۔ان کے اس اقدام کا مقصد نوجوانوں کی حوصلہ افزائی کرنا اور انہیں ایک اچھا مستقبل فراہم کرنا ہے، وزیراعظم ریلیف پیکیج کے تحت احساس پروگرام کے ذریعے عوام کو اربوں روپے کا ریلیف فراہم کیا جائے گا اور ایک محتاط اندازے کے مطابق دو کروڑ سے زائد افراد اس پیکیج سے مستفید ہونگے۔ ملک کا وقار بلند اور ترقی کی راہ پر گامزن کرنا چاہتے ہیں ۔
انہوں نے کہاکہ ابھی الیکشن کا وقت نہیں ، نہ الیکشن کی تیاریاں شروع ہیں۔ کچط لوگ کہتے تھے الیکشن جیت کر شاہ محمود قریشی نے حلقے میں نظر نہیں آنا، انہیں بتادیں میں الیکشن جیت کر حلقے میں ہوتا ہوں اور حلقے کی عوام کے درمیان وقت گزارتا ہوں، این اے 156 کا منتخب نمائندہ ہوں خلوص نیت سے تمام وسائل اور توانائیاں حلقے کی ترقی پر صرف کررہا ہوں، ملتان کے حلقے کا منتخب نمائندہ پوری دنیا میں پاکستان کی نمائندگی کر رہا ہے اور خلوص نیت سے پاکستان کا مقدمہ لڑرہا ہے، سرکاری ذمہ داریوں سے ہٹ کر جو بھی ٹائم ملتا ہے وہ حلقے کے عوام کے ساتھ گزارتا ہوں، گزشتہ تین سال کا ریکارڈ نکالا جائے ، کوشش کی زیادہ سے زیادہ وقت حلقے کے عوام کو دیا جائے۔
وزیر خارجہ مخدوم شاہ محمود قریشی نے کہا کہ این اے 156 میں ایک ارب روپے سے زائد کے ترقیاتی منصوبے زیر تکمیل ہیں جن کی تکمیل سے حلقے کی ترقی کے ایک نئے دور کا آغاز ہوگا۔ انہوں نے ملتان میں مصروف دن گزارا، وہ حلقے کی مختلف یونین کونسلو ںمیں وفات پا جانے والی شخصیات کی رہائش گاہوں پر گئے اور مرحومین کے ایصال ثواب کیلئے فاتحہ خوانی کی۔ انہوں نے مختلف استقبالیہ تقریبات میں بھی شرکت کی۔
