اسلام آباد ، 24 نومبر (اے پی پی ): وزیر اعظم عمران خان نے کہا ہے کہ موسم سرما میں پولیو کے پھیلاو کی شرح کم ہوتی ہے اور بچوں کی ایمیونائزیشن کے لیے یہی موزوں ترین وقت ہوتا ہے، ہم سب نے مل کر پولیو وائرس کا خاتمہ کرنا ہے۔
ان خیالات کا اظہار وزیر اعظم نے بدھ کو یہاں قومی ٹاسک فورس برائے انسداد پولیو کے اجلاس کی صدارت کرتے ہوئے کیا ۔وزیر اعظم نے انسداد پولیو کے موثر اقدامات پر صوبائی صحت کے محکموں اور ضلعی انتظامیہ کو خراج تحسین پیش کیا ۔
اجلاس میں انسداد پولیو کے لیے دو سالہ نیشنل ایمرجنسی ایکشن پلان 23-2022 کی منظور دی گئی۔ وزیر اعظم نے بین الاقوامی شراکت داروں کا مالی اور تکنیکی امداد پر شکریہ ادا کیا۔
وزیر اعظم نے ہدایت کی کہ بین الاقوامی برادری کو پولیو کے خاتمے میں افغانستان کی بھی مدد کرنی چاہیئے تاکے ہنگامی صورتحال سے بچا جا سکے،بچوں کے دیگر ایمیونائزیشن پروگرامز کو بھی انسداد پولیو مہم کے ساتھ چلایا جائے تاکہ زیادہ سے زیادہ کوریج حاصل کی جاسکے۔
اجلاس کو بریفنگ دی گئی کہ اگلے پانچ سالوں کے لیے 798.6 ملین ڈالر کا PC-I منظوری کے لیے تیار ہے جس میں بین الاقوامی اداروں اور حکومت پاکستان کی مالی معاونت شامل ہے۔اجلاس کو آگاہ کیا گیا کہ سال 2020 میں پولیو کے 84 کیس رپورٹ ہوئے جبکہ گزشتہ دس ماہ میں کوئی کیس رپورٹ نہیں ہوا جو پاکستان کی انسداد پولیو کے حوالے سے بڑی کامیابی ہے۔اجلاس کو آگاہ کیا گیا کے پاکستان میں پولیو وائرس افغان مہاجرین کے ذریعے داخل ہوتا ہے۔
اجلاس کو بتایا گیا کے پاکستان کو 36 ماہ کا عرصہ بغیر کسی پولیو کیس کے رپورٹ ہوئے مکمل کرنے کے بعد ولڈ ہیلتھ آرگنائزیشن کی طرف سے “Polio Free” سرٹیفیکیٹ حاصل ہو جائے گا۔انجنئیر ان چیف پاکستان آرمی نے اجلاس کو پولیو ٹیموں کو فراہم سیکیورٹی کے حوالے سے آگاہ کیا۔
بین الاقوامی اداروں کے نمائندوں نے انسداد پولیو مہم کی موثر قیادت پر وزیر اعظم نے شکریہ ادا کیا اور مکمل تعاون کے عظم کا اظہار کیا۔
بین الاقوامی اداروں کے نمائندوں نے حکومت پاکستان کے انسداد پولیو اقدامات پر مکمل اعتماد کا اظہار کیا۔
اجلاس میں معاون خصوصی ڈاکٹر فیصل سلطان، گورنر خیبر پختونخوا شاہ فرمان، وزیر اعلی پنجاب سردار عثمان بزدار، وزیر اعلی خیبرپختونخوا محمود خان، وزیر اعلی گلگت بلتستان خالد خورشید، وزیر صحت بلوچستان سید احسن شاہ، وزیر اعظم آزاد جموں و کشمیر سردار عبدالقیوم خان نیازی، انجنئیر ان چیف پاکستان آرمی لیفٹیننٹ جنرل معظم اعجاز، تمام چیف سیکریٹریز، WHO, UNICEF, CDC, Gavi, Bill & Melinda Gates Foundation, Rotary International کے اعلی حکام اور سینیر سرکاری افسران نے شرکت کی ۔
