وہاڑی ،01 دسمبر(اے پی پی): ڈپٹی کمشنروہاڑی محمد خضر افضال چوہدری نے کہا کہ ریونیو عوامی خدمت سروسز کا مقصد ایک ہی چھت تلے ریونیوسے متعلقہ عوامی مسائل کو بروقت حل کرنا ہے۔ یہ بات انہوں نے اپنے زیر صدارت ضلع کونسل ہال وہاڑی میں ریونیو عوامی خدمت سروسز کے انعقاد کے موقع پر کہی۔
ڈپٹی کمشنر نے کہا کہ وزیر اعلیٰ پنجاب سردارعثمان بزدار کے وژن کے مطابق بہترین ریونیو سروسز کی فراہمی جاری ہے، ریونیو عوامی خدمت سروسز سے عوام کا اپنے مسائل کے حل کے حوالے سے اعتماد بڑھا رہا ہے اور کہا کہ ریونیو افسران عوامی خدمت کو اپنا شعار بنائیں عوامی مسائل کو حل کرنا ہماری ذمہ داری ہےعام روٹین میں بھی عوام کے ریونیو سے متعلقہ مسائل کو ترجیح بنیادوں پر حل کیا جائےعوامی مسائل کے حل میں کسی قسم کی کوتاہی قابل قبول نہیں ہے۔
ریونیو عوامی خدمت سروسز میں انتقالات، رجسٹری، ڈومیسائل کااجراء، انکم سرٹیفیکٹس اور ریونیو سے متعلقہ دیگر مسائل سن کر حل کیلئے احکامات جاری کئے گئے۔ اس موقع پر اے ڈی سی ریونیو اشفاق الرحمن خان، اے سی وہاڑی سید وسیم حسن، ریونیو آفیسران اور دیگر سٹاف موجود تھا۔
