لاہور 15 دسمبر(اے پی پی): گورنر پنجاب چوہدری محمد سرور کا کہنا ہے کہ تعلیم کے میدان میں لڑکیاں ہمیشہ لڑکوں سے آگے رہتی ہیں۔ گورنر پنجاب چوہدری محمد سرور نے یوتھ کانفرنس سے خطاب کرتے ہوئے کہا کہ علیحدگی اور پسماندگی کا احساس نو جوانوں کو کمزور، متشدد اور انتہا پسند بنا دیتا ہے۔ نوجوان نسل تبدیلی کا محرک ہے اور صدر مملکت عارف علوی خواتین کے حقوق دلوانے کے بڑے حامی ہیں۔ چوہدری محمد سرور نے کہا کہ نوجوانوں کی صلاحیت کو دیکھ کر خوشی ہوتی ہے، وزیراعظم عمران خان نوجوانوں کی بہتری کے لیے کئی اقدامات کررہے ہیں۔گورنر پنجاب کا کہنا تھا کہ مجھے خوشی ہوتی ہے کہ نوجوان نسل کی وجہ سے قائد اعظم کا خواب پورا ہو گا، ہماری یونیورسٹیوں میں لڑکیاں لڑکوں سے بہتر کام کر رہی ہیں۔چوہدری محمد سرور نے کہا کہ خواتین کو وراثت میں حصہ دلوانے کے لیے مہم چل رہی ہے، معاشرے میں اپنے کسی رشتےدار کو باہر بھجوانے لیے بچی کی شادی خلاف مرضی کر دیتے ہیں۔گورنر پنجاب نے کہا کہ ہمیں اپنے بچوں کی خواہشات کا بھی احترام کرنا ہے کیونکہ دنیا بھر میں تشدد انتہا پسندی بڑھ رہی ہے۔انہوں نے کہا کہ دنیا بھر میں نوجوان امن قائم کرنے کے لیے کام کر رہے ہیں۔
