لاہور، 15 دسمبر ( اے پی پی ): وزیراعلیٰ پنجاب سردار عثمان بزدار نے کہا ہے کہ ہیلتھ ڈویلپمنٹ پراجیکٹس میں تاخیر قابل برداشت نہیں کی جائے گی ،عوام کی سہولت کے پیش نظر اضلاع کے ہسپتالوں اور طبی مراکز صحت کے زیر تکمیل منصوبوں کو جلد مکمل کیا جائے۔
ان خیالات کا اظہار انہوں نے بدھ کو یہاں اپنی زیر صدارت منعقدہ اجلاس میں کیا، اجلاس میں محکمہ صحت کے ترقیاتی منصوبوں پر پیش رفت کا جائزہ لیا گیا ۔
اجلاس سے خطاب میں وزیر اعلیٰ پنجاب نے مدر اینڈ چائلڈ ہسپتالوں کے منصوبوں پر کام کی رفتار تیز کرنے کی ہدایت کرتے ہوئے کہا کہ جناح ہسپتال اور نئے جنرل ہسپتال میں ایمرجنسی بلاک وقت کی اہم ضرورت ہے۔سروسز ہسپتال میں مریضوں کے رش کے پیش نظر ایمرجنسی بلاک کی تعمیر و توسیع کی جائے گی جبکہ دور دراز علاقوں کے ہسپتالوں اور مراکز صحت کے توسیعی منصوبوں میں معیار اور شفافیت کو ملحوظ خاطر رکھا جائے،ضلعی ہسپتالوں میں کارڈیک وارڈ بننے سے بڑے ہسپتالوں میں رش کم ہوگا۔
انہوں نے کہا کہ بلوچستان کے ضلع رکھنی میں جدید سہولیات سے مزین ہسپتال بنائیں گے۔رکھنی کے سول ہسپتال میں گائنی اور ایمرجنسی علاج کی سہولتیں بھی فراہم کی جائیں گی۔
اجلاس میں صوبائی وزیر صحت ڈاکٹر یاسمین راشد، سیکرٹری سپیشلائزڈ اینڈ میڈیکل ایجوکیشن، سیکرٹری پرائمری اینڈ سیکنڈری ہیلتھ اور دیگر حکام نے شرکت کی۔
