اسلام آباد،18دسمبر(اے پی پی):وزیر خارجہ مخدوم شاہ محمود قریشی نے وزارتِ خارجہ کے سینئر حکام کے ہمراہ پارلیمنٹ ہاؤس کا دورہ کیا۔وزارت خارجہ کے سینئر حکام نے وزیر خارجہ کو پارلیمنٹ میں او آئی سی وزرائے خارجہ کونسل کے غیر معمولی اجلاس کے حوالے سے کیے گئے انتظامات سے متعلق تفصیلی بریفنگ دی۔
وزیر خارجہ نے کانفرنس ہال، وفود کی سہولت کیلئے بنائے گئے کاؤنٹرز، میڈیکل سینٹر، میڈیا سینٹر اور مختلف میٹنگ رومز ملاحظہ کیے اور انتظامات پر اطمینان کا اظہار کیا۔
اس موقع پر وزیر خارجہ مخدوم شاہ محمود قریشی نے کہا کہ او آئی سی وزرائے خارجہ کونسل کے غیر معمولی اجلاس کی میزبانی کو بہت بڑا اعزاز سمجھتے ہیں، وزیر اعظم عمران خان کی خصوصی ہدایت پر مہمان وزرائے خارجہ و دیگر وفود کی سہولت کیلئے ہر ممکن انتظامات کو یقینی بنایا گیا ہے۔انہوں نے کہا کہ آج پارلیمنٹ میں اعلیٰ حکام کی بیٹھک ہو گی جس میں کل کے ایجنڈے کو حتمی شکل دی جائے گی۔
مخدوم شاہ محمود قریشی نے کہا کہ امید ہے کہ افغانستان کی انسانی صورتحال کے تناظر میں منعقد ہونیوالے اس غیر معمولی وزرائے خارجہ اجلاس کے مثبت نتائج سامنے آئیں گے۔
اسپیشل سیکرٹری خارجہ رضا بشیر تارڑ، ترجمان وزارت خارجہ عاصم افتخار و دیگر سینیر افسران وزیر خارجہ کے ہمراہ تھے۔
سورس: وی این ایس، اسلام آباد
