پاکستان اور آذربائیجان کے مابین گہرے برادرانہ مراسم ہیں ، دوطرفہ تعلقات کی بنیاد یکساں تاریخی، تہذیبی اور ثقافتی اقدار پر استوار ہے،مخدوم شاہ محمود قریشی کی آذربائیجان کے ہم منصب سے ملاقات میں  گفتگو

اسلام آباد۔18دسمبر  (اے پی پی):وزیر خارجہ مخدوم شاہ محمود قریشی نے کہا کہ پاکستان اور آذربائیجان کے مابین گہرے برادرانہ مراسم ہیں ، دونوں ممالک کے درمیان دوطرفہ تعلقات کی بنیاد یکساں تاریخی، تہذیبی اور ثقافتی اقدار پر استوار ہے، پاکستان،وسط ایشیا وژن کی پیروی کرتے ہوئے، آذربائیجان سمیت وسط ایشیائی ممالک کے ساتھ دیرپا اور نتیجہ خیز روابط کے قیام کا خواہاں ہے۔ ان خیالات کا اظہار انہوں نے آذربائیجان کے وزیر خارجہ جیہون بیراموف سے ملاقات کے دوران کیا۔ جو او آئی سی وزرائے خارجہ کونسل کے غیر معمولی اجلاس میں شرکت کیلئے پاکستان تشریف لائے ہیں۔ آذربائیجان کے وزیر خارجہ جیہون بیراموف کی وفد کے ہمراہ وزارتِ خارجہ آمد  پر وزیر خارجہ مخدوم شاہ محمود قریشی نے معزز مہمان کا خیر مقدم کیا۔  اس  موقع  پر  مخدوم شاہ محمود قریشی نے کہا کہ پاکستان، وسط ایشیائی ممالک کے ساتھ سیاسی، تجارتی، اقتصادی و دفاعی روابط کے فروغ پر توجہ مرکوز کئے ہوئے ہے۔ وزیر خارجہ نے کہا کہ پاکستان نے ہمیشہ نوگورنو کاراباخ کے معاملے پر آذربائیجان کے اصولی موقف کی بھرپور حمایت کی ہے، پاکستان، آزربائیجان مشترکہ اقتصادی چیمبر کا قیام خوش آئند ہے۔ اس موقع پر دونوں وزرائے خارجہ کا پاکستان اور آذربائیجان کے مابین ترجیحی تجارتی معاہدہ کے حوالے سے جلد مذاکرات کے انعقاد پر اتفاق کیا۔ وزیر خارجہ نے کہا کہ پاکستان، مارچ 2022 میں او آئی سی وزرائے خارجہ کونسل کے اڑتالیسویں اجلاس کی میزبانی کیلئے تیار ہے، یکے بعد دیگرے دو وزرائے خارجہ کونسل کے اجلاسوں کی میزبانی، مسلم امہ کیلئے پاکستان کی سنجیدہ سوچ کی ترجمانی کرتی ہے۔ مخدوم شاہ محمود قریشی نے کہا کہ پاکستان، او آئی سی کو مسلم امہ کی مستحکم آواز جانتے ہوئے، اسلامو فوبیا، امن و سلامتی اور دیرینہ تنازعات کے حل کیلئے او آئی سی کے موثر کردار کا متقاضی ہے۔ انہوں نے کہا کہ چالیس سال کی جنگ و جدل کے بعد افغانستان میں قیام امن کا موقع میسر آ رہا ہے، افغانستان میں ابھرتے ہوئے انسانی بحران کے حل کے لئے فوری اقدامات نہ کئے گئے تو اس کے اثرات ہمسایہ ممالک، خطے اور دنیا بھر کیلئے مضر ہو سکتے ہیں۔ وزیر خارجہ نے کہا کہ ہم مسئلہ کشمیر کے حوالے سے او آئی سی کی مسلسل اور غیر متزلزل حمایت پر او آئی سی کے شکر گزار ہیں، ستاون مسلم ممالک کی آواز کی حامل او آئی سی، اقوام متحدہ کی قراردادوں کے مطابق مسئلہ کشمیر کے منصفانہ حل کیلئے موثر کردار ادا کر سکتی ہے۔ آذربائیجان کے وزیر خارجہ نے پر خلوص میزبانی پر وزیر خارجہ مخدوم شاہ محمود قریشی کا شکریہ ادا کیا۔