لاہور، 3جنوری(اے پی پی): وزیراعلیٰ پنجاب سردار عثمان بزدار سے سپیکر پنجاب اسمبلی چودھری پرویزالہٰی اور وفاقی وزیر آبی وسائل چودھری مونس الہٰی نے پیر کو یہاں ملاقات کی ، جس دوران سیاسی صورتحال، بلدیاتی الیکشن اورفلاح عامہ کے منصوبوں پر تبادلہ خیال کیا گیا۔
وزیراعلیٰ پنجاب اور سپیکر پنجاب اسمبلی نے ورکنگ ریلیشن شپ کو مزید مضبوط بنانے پراتفاق کیا، دونوں نے مل کر بلدیاتی الیکشن میں حصہ لینے کے عزم کا اظہار کیا۔
عثمان بزدار نے کہا کہ پنجاب میں پاکستان مسلم لیگ (ق) کے ساتھ بہترین ورکنگ ریلیشن شپ ہے، اہم امور پرمشاورت کا سلسلہ آئندہ بھی جاری رہے گا،عوام کی خدمت کے سفر کو مزید تیزی سے آگے بڑھائیں گے۔انہوں نے کہا کہ تنقید برائے تنقید کرنے والے عناصر کو اپنی کارکردگی سے جواب دیں گے،تحریک انصاف کی حکومت کے دور میں جوپائیدارکام کیے ہیں ان کی مثال ماضی میں نہیں ملتی، مختصرمدت میں عوام کو ریلیف دیا ہے اوران کیلئے آسانیاں پیدا کی ہیں، اپوزیشن کے پاس نہ کوئی بیانیہ ہے اورنہ کوئی حکمت عملی۔
چودھری پرویزالہٰی نے کہا کہ عوام کوریلیف کی فراہمی کیلئے مل کر کام کررہے ہیں اور کرتے رہیں گے، خلوص نیت کے ساتھ اتحاد کو آگے بڑھا رہے ہیں، بلدیاتی الیکشن میں مشترکہ امیدوار سامنے لانے کیلئے بات چیت کاسلسلہ جاری رہے گا۔
پرنسپل سیکرٹری وزیراعلی پنجاب عامر جان اور سیکرٹری پنجاب اسمبلی محمد خان بھٹی بھی اس موقع پر موجود تھے۔
