لاہور، 3جنوری(اے پی پی): وفاقی وزیر داخلہ شیخ رشید احمد اور وزیر اعلی عثمان بزدار کے درمیان پیر کو یہاں ملاقات ہوئی ، جس دوران سیاسی اموراورامن عامہ کی صورتحال پر تبادلہ خیال کیا گیا۔ملاقات میں راولپنڈی میں فلاح عامہ کے جاری منصوبوں پر پیشرفت پر بھی بات چیت کی گئی۔ وزیر اعلی نے کہا کہ راولپنڈی کے فلاحی منصوبوں کو جلد ازجلد مکمل کیا جائے گا ،راولپنڈی تحریک انصاف کا قلعہ ہے راولپنڈی شہر کے مسائل حل کرنے پر پوری توجہ ہےسیاست میں رواداری،برداشت اوربھائی چارے کے قائل ہیں شرافت، شفافیت اوردیانت کے اصولوں پرچلتے ہیں عثمان بزدار نے مزید کہا کہ نفاق کے بیج بونے والوں کوپہلے اپنے گریبان میں جھانکنا چاہیئےماضی میں سیاسی انتقام کے کلچر کو پروان چڑھایا گیاالزامات لگانا اوردشنام طرازی ہمارا شیوہ نہیں ہماری حکومت نے سیاسی انتقام کی منفی سیاست کو ختم کیا ہےصوبے میں عوام کے جان ومال کے تحفظ کیلئے تمام ضروری اقدامات کیے ہیں اور قانون کی عملداری کو یقینی بنایاگیا ہے منفی رویے اور انتشار کی سیاست ملک کی یکجہتی اور استحکام کیلئے نقصان دہ ہیں۔
وفاقی وزیر داخلہ نے کہا کہ پنجاب حکومت راولپنڈی کے عوام کے مسائل کو ترجیحی بنیادوں پر حل کررہی ہے اللہ تعالیٰ کے فضل و کرم سے امن وعامہ کی صورتحال اطمینان بخش ہے حکومت عوام کے جان ومال کے تحفظ کے لئے ہر ممکن اقدام کررہی ہے اورکرتی رہے گی23مارچ کو مارچ کا اعلان کرنے والوں کو ہوش کے ناخن لینے چاہئیں قانون ہاتھ میں لینے کی کسی کو اجازت نہیں دی جا سکتی اپوزیشن ٹولے کے ہاتھ سے وقت ریت کی طرح نکلتا جارہاہےوزیراعظم عمران خان کی قیادت میں حکومت پہلے سے زیادہ مضبوط ہے اور مدت پوری کرے گی۔
