اسلام آباد۔24جنوری (اے پی پی):کابینہ کی خصوصی کمیٹی نے پاکستان اور برطانیہ کے مابین ریٹرنزاینڈ ری ایڈمشن معاہدے کے حوالے سے سفارشات کو حتمی شکل دے دی ہے۔ معاہدے کامسودہ مشاورت کے لئے برطانوی حکومت کو بھی بھجوانے کے بعد حتمی منظوری کے لئے وفاقی کابینہ میں پیش کیاجائے گا۔ پیر کو وزارت داخلہ کی طرف سے جاری بیان کے مطابق اس معاہدے کے حوالے سے خصوصی کابینہ کمیٹی کا اجلاس وزارت داخلہ میں وفاقی وزیر داخلہ شیخ رشید کی زیر صدارت منعقد ہوا جس میں وزیر خارجہ مخدوم شاہ محمود قریشی، وفاقی وزیر برائے انسانی حقوق شیریں مزاری کے علاوہ وفاقی سیکرٹری وزارت قانون، جوائنٹ سیکرٹری داخلہ سمیت دیگر اعلی حکام نے بھی اجلاس میں شرکت کی جبکہ وفاقی سیکرٹری داخلہ یوسف نسیم کھوکھر نے بذریعہ وڈیو کانفرنس شرکت کی ۔ کمیٹی نے پاکستان اور برطانیہ کے درمیان ریٹرنز اینڈ ری ایڈمشن معاہدے کے حوالے سے سفارشات کو حتمی شکل دی ۔ کمیٹی نے معاہدے کے مسودے کو مشاورت کیلئے برطانوی حکومت کے ساتھ شیئر کرنے کا فیصلہ کیا۔ معاہدے کے تحت صرف ایسے شہریوں کو واپس لانے کی اجازت ہوگی جن کو متعلقہ عدالتیں سزائیں سنا چکی ہوں گی۔برطانیہ سے مشاورت کے بعد معاہدے کو وفاقی کابینہ سے حتمی منظوری کے لئے پیش کیا جائے گا۔کابینہ کمیٹی نے پاک برطانیہ مجرمان حوالگی کے معاہدہ کو بھی جلد مکمل کرنے کا فیصلہ کیا۔ مجرمان حوالگی معاہدہ طے پانے سے پاکستان اور برطانیہ کے درمیان سزا یافتہ افراد کی حوالگی ممکن ہوسکے گی۔
