اسلام آباد،23فروری (اے پی پی):وفاقی دارالحکومت کے سرکاری پرائمری تعلیمی اداروں میں طلبہ کیلئے حکومت کی جانب سے لنچ کی فراہمی شروع کردی گئی ہے۔
بدھ کو وفاقی وزیرِ تعلیم شفقت محمود نے بچوں کو کھانا دے کر سکول کھانا پروگرام کا افتتاح کیا ۔وفاقی وزیر نے بتایا کہ پروگرام کے تحت اسلام آباد کے 100 پرائمری سکولوں میں 25 ہزار بچوں کو روزانہ کی بنیاد پر کھانا دیا جائے گا۔سکول کھانا پروگرام کے افتتاح کے موقع پر بات کرتے ہوئے وزیر تعلیم شفقت محمود نے کہا کہ اللہ والے ٹرسٹ کی جانب سے سرکاری پرائمری سکولز میں طلبا کو کھانادیا جائے گاجس پر ٹرسٹ کا شکر گزار ہوں، ایسے ادارے ہمارے لئے مشعل راہ ہیں، ہم اس پروگرام کو حکومتی سطح پر بھی آگے لے کر جائیں گے۔انہوں نے کہا کہ یونیسف کی ڈائریکٹر سے ملاقات ہوئی ہے اور ہماری بڑی خواہش کے کہ پورے ملک میں یہ ماڈل شروع کر سکیں لیکن بجٹ کی کمی کے باعث مشکلات ہیں۔
شفقت محمود کا کہنا تھا کہ بہت سارے بچے جو سکول نہیں جاتے اس میں غربت بھی ایک بڑی وجہ ہے، آج کلاس سے پوچھا گیا تو صرف ایک بچہ نے کہا کہ وہ ناشتہ کر کے آیا ہے، یہ پہلا قدم ہے جس میں 100 پرائمری سکولز کے بچوں کو کھانا دیا جائے گا، جلد ہی اسلام آباد کے تمام پرائمری سکولز میں یہ شروع کریں گے۔
اس موقع پر قائد اعظم یونیورسٹی کے وائس چانسلر ڈاکٹر محمد علی شاہ، آئی بی سی سی کے سیکرٹری ڈاکٹر غلام علی ملاح،ڈی جی ایف ڈی ای ڈاکٹر اکرام علی ملک بھی موجود تھے۔
