لاہور،03مئی(اے پی پی):وزیراعظم شہباز شریف نے کہا ہے کہ احتساب اور شفافیت لانے کیلئے قوانین کے حوالے سے تمام اسٹیک ہولڈرز سے مشاورت کی جائے گی، سول سرونٹس حکومتی ٹیم کا حصہ ہوتے ہے ان کے خدشات کا تدارک بھی ضروری ہے۔
ان خیالات کا اظہار انہوں نے منگل کو یہاں ریٹائرڈ اور حاضر سروس سول و انتظامیہ کے افسران سے ملاقات میں گفتگو کرتے ہوئے کیا۔ملاقات میں وزیرِ اعظم کو شریک افسران نے گورننس، انتظامی امور اور پالیسیوں کے نفاذ کے حوالے سے اپنے تجربات سے آگاہ کیا۔
وزیراعظم شہباز شریف نے کہا کہ دل کی گہرائیوں سے آپ کو عید کی مبارک باد پیش کرتا ہوں، پاکستان کی خوشی قسمتی ہے کہ یہاں آپ جیسے قابل افسران موجود ہیں، بلاشبہ آپ ملک کا قیمتی اثاثہ ہیں۔انہوں نے کہا کہ قابلِ افسران سیاسی حکومت کی ملکی ترقی و خوشحالی میں راہنمائی اور معاونت کرتے ہیں۔
وزیرِ اعظم شہباز شریف نے کہا کہ جو میگا پراجیکٹس پایہ تکمیل کو پہنچے، چاہے وہ میٹرو ہو یا اورنج لائن افسران و دیگر حکومتی اہلکاروں کی شبانہ روز محنت کا نتیجہ ہیں۔انہوں نے کہا کہ کپتان اپنی ٹیم کے بغیر کچھ نہیں کر سکتا۔
وزیرِ اعظم شہباز شریف نے کہا کہ سابقہ دور میں احتساب اور شفافیت کی آڑ میں افسران کو بلاوجہ ہراساں کرکے انکی کارکردگی کو متاثر کرنے کی کوشش کی گئی۔انہوں نے کہا کہ قومی خدمت ہمارا نصب العین ہے، اس امر میں کسی بھی قسم کی کوتاہی یا غفلت قبول نہیں۔انہوں نے کہا کہ اللہ نے مجھے ایک بار پھر قوم کی خدمت کا موقع دیا ہے. میرا یہ عزم ہے کہ قابل افسران کے ساتھ یہ سفر شروع کروں۔
اجلاس میں چیف سیکرٹری پنجاب، مختلف محکموں کے سیکریٹریز، سابقہ چیف سیکٹریز اور مختلف محکموں کے سربراہوں نے مستقبل کے منصوبوں، موثر بیوروکریسی کے کردار اور عوام کو مختلف شعبوں میں ریلیف کے حوالے سے تجاویز بھی دیں۔
