بارشوں کی وجہ سے پیدا ہونے والی کسی بھی ہنگامی صورتحال سے نمٹنے کیلئے متعلقہ ادارے پوری طرح چوکس رہیں؛اے ڈی سی پاکپتن ماہم آصف ملک

پاکپتن،15جولائی  (اے پی پی): ایڈیشنل ڈپٹی کمشنر(ریونیو) ماہم آصف ملک نے کہا ہے  کہ ممکنہ مون سون بارشوں کی وجہ سے پیدا ہونے والی کسی بھی ہنگامی صورتحال سے نمٹنے کے لیے متعلقہ ادارے پوری طرح چوکس رہیں،  ریسکیو1122کے پاس موجود آلات اور ٹرینڈ سٹاف کسی بھی ہنگامی حالات سے نمٹنے کی مکمل صلاحیت رکھتا ہے۔

ان خیالات کا اظہار انہوں نے ریسکیو1122پاکپتن کے زیر اہتمام نہر (اپر کینال جمال چوک) پر فلڈ موک ایکسر سائز میں کیا۔انہوں نے فلڈ سے متعلقہ تمام سامان کامعائنہ کیا اور ریسکیو 1122 کی آپریشنل صلاحیت پر ریسکیو اہلکاروں اور ریسکیو رضاکاروں کو شاباش دی۔

موک ایکسر سائز میں ریسکیو 1122کے علاوہ محکمہ پولیس،اسپیشل برانچ،  لائیو سٹاک، محکمہ ہیلتھ، محکمہ ہائی وے، سول ڈیفس نے حصہ لیا۔ اس موقع پر ریسکیو 1122 پاکپتن نے ڈوبتے لوگوں کو بچانے، لوگوں کو محفوظ مقام پر منتقل کرنے اور پانی میں ڈوبے افراد کو نکالنے اور اسپیشل ریسکیو وہیکل کے تمام فنکشنز کا عملی مظاہر ہ بھی کیا۔ موک ایکسر سائز میں ریسکیو 1122کے کمیونٹی سیفٹی پروگرام کے تحت تربیت پانے والے ریسکیو رضاکاروں کی کثیر تعداد موجود تھی۔اسسٹنٹ کمشنرشرجیل شاہد کا کہنا تھا کہ ریسکیو1122 نے اپنے وسائل کابہتر استعمال کرتے ہوئے اچھی صلاحیت کا مظاہرہ کیا ہے۔

ڈسٹرکٹ ایمرجنسی آفیسرریسکیو 1122ڈاکٹر احتشام مظہر نے اے ڈی سی(ر)پاکپتن کو موک ایکسرسائز کے دوران مختلف محکموں کی طرف سے لگائے گئے نمائشی کیمپوں کا معائنہ کراتے ہوئے انکی کارکردگی سے بھی آگاہ کیا اور بتایا کہ وہ کسی بھی قسم کی ناگہانی صورتحال سے نمٹنے کے لیے ہمہ وقت تیار ہیں۔موک ایکسرسائز کا مقصد تمام اداروں کے باہمی ربط اورریسپانس کو چیک کرنا تھا۔